Ազգային ժողովի ՀՀԿ խմբակցության պատգամավոր Լեւոն Մարտիրոսյանը կարծում է, որ Գյումրիում Ավետիսյանների սպանությունը պետք չէ ստվեր նետի հայ-ռուսական հարաբերությունների վրա:
«Արտառոց դեպք է տեղի ունեցել եւ բազմաթիվ վարկածներ են հնչում, բայց դրանց պատասխանները պետք է քննությունը տա: Քննությունը պետք է անցկացվի ամենաորակյալ ձեւով: Որքան էլ ողբերգական դեպք եղած լինի, պետք չէ ստվեր նետի մեր հարաբերությունների վրա»,- այսօր` հունվարի 29-ին, լրագրողների հետ զրույցում ասաց Լեւոն Մարտիրոսյանը:
ՀՀԿ-ական պատգամավորի հետ, սակայն, համաձայն չէ «Ժառանգություն» կուսակցության փոխնախագահ Արմեն Մարտիրոսյանը, որը նշեց` հայ-ռուսական հարաբերություններ չկան:
«Մի բան այս պահին հստակ է, որ Պերմյակովը միայնակ չի գործել: Այս դեպքերի ամբողջ ընթացքում Հայաստանի իշխանությունները շատ հանգիստ լսել են Ռուսաստանին: Ենթակայությունն ակնհայտ է: Ապացույցն այն է, որ Պուտինի հեռախոսազանգից հետո Սերժ Սարգսյանը ցավակցական խոսք հղեց: Եթե Ռուսաստանն է գործը քննելու, ապա դա շատ հարցեր եւ անվստահություն կառաջացնի»,- հավելեց կուսակցության փոխնախագահը:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց, սակայն դեպքից 7 օր անց հիվանդանոցում մահացել է նաեւ նա:
Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Հունվարի 21-ին Պերմյակովին մեղադրանք են առաջադրել նաեւ հայ քննիչները՝ ՀՀ Քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Ռուս զինծառայողն ընդունել է առաջադրված մեղադրանքը:
