Երեւանում այսօր՝ հունվարի 29-ին, մոտ մեկ տասնյակ քաղաքացիներ ԵԱՀԿ գրասենյակ հանձնեցին Հայաստանում գրասենյակի գործունեությունը դադարեցնելու պահանջով նամակ։ Ակցիայի նախաձեռնող Կարեն Վարդանյանը NEWS.am-ի հետ զրույցում ասաց, որ իրենք անիմաստ են համարում Հայաստանում ԵԱՀԿ գրասենյակի գործունեությունը, քանի որ այն բացի ձեւական հայտարարություններ տարածելուց ոչինչ չի անում:
«Ակցիայի նպատակն է տեղեկացնել, որ չնայած ամեն օր շփման գծում հրադադարի ռեժիմը խախտվում է, մենք զոհեր ենք ունենում, եւ դրա միակ հրահրողը միանշանակ Ադրբեջանն է, սակայն ԵԱՀԿ-ն, որն իբր ստանձնել է կարգավորողի, միջնորդի դերը, այդ ուղղությամբ ոչինչ չի անում: ԵԱՀԿ-ն միայն ձեւական հայտարարություններ է անում, որտեղ երկու կողմերին էլ հանդարտության կոչ է անում այն դեպքում, որ իրենք շատ լավ գիտեն, որ դա անիմաստ է»,-ասաց նա:
Նրա խոսքով՝ ԵԱՀԿ-ն իր դրսեւորած վերաբերմունքով դառնում է Ադրբեջանի ագրեսիայի լուռ հովանավորը:
Կարեն Վարդանյանը նշեց, որ որեւէ պատասխանի ակնկալիք չունի, սակայն ակցիան հասարակության ուշադրությունը կհրավիրի ԵԱՀԿ գործունեությանը Հայաստանում:
