Մարդու իրավունքների եվրոպական դատարանը պաշտպանել է ադրբեջանցի ռազմական փորձագետ Ուզեիր Ջաֆարովին:
Turan-ի փոխանցմամբ՝ ՄԻԵԴ-ը ճանաչել է Ջաֆարովի իրավունքի խախտումները եւ վճռել նրան 10 հազար եվրո փոխհատուցում վճարել, ինչպես նաեւ 4.4 հազար եվրո՝ դատական ծախսերի փոխհատուցման համար:
2007թ. «Գյունդելիք Ադրբեջան» եւ «Իրական Ադրբեջան» թերթերի թղթակիցը դաժանորեն ծեծվել է բանակային խնդիրների մասին քննադատական հոդվածներ հրապարակելու համար: Փաստի առթիվ քրեական գործ է հարուցվել, սակայն հետաքննությունը ավարտին չի հասցվել, եւ հանցագործության համար ոչ ոք չի պատժվել:
Ոստիկանության անգործության վերաբերյալ Ջաֆարովի բողոքները դատարանների կողմից բավարարում չեն ստացել եւ ուստի նա որոշել է դիմել ՄԻԵԴ-ին:
«Ինձ համար առավել կարեւոր է ՄԻԵԴ-ի որոշումը իմ իրավուքնների եւ արդարության վերականգնման տեսակետից, քան փոխահատուցման գումարը: Դատարանի որոշումը սահմանում է ոչ միայն փոխահատուցումը, այլ նաեւ նախադրյալներ է ստեղծում հետաքննության եւ մեղավորներին պատժելու համար:
Ես գիտեմ այդ մարդկանց: Նրանցից մեկն աշխատում է ռազմական ոստիկանությունում, մյուսը՝ արտգործնախարարությունում: Մարդու իրավունքների եվրոպական դատարանի վճիռը կարեւոր է նաեւ լրագրողների եւ ակտիվիստների դեմ հանցագործությունները անպատժելի չթողնելու տեսակետից», - ասել է Ջաֆարովը:
