Ապրիլի 24-ին տոնական միջոցառում կազմակերպելու Թուրքիայի քայլը առաջին հայացքից հաջող էր թվում, սակայն այսօր, դատելով միջազգային մամուլի արձագանքից, կարելի է արձանագրել, որ դա այդպես չէ: Այդ մասին այսօր՝ հունվարի 30-ին, մամուլի ասուլիսի ժամանակ հայտարարեց «Եվրոպական ինտեգրացիա» հասարակական կազմակերպության նախագահ Կարեն Բեքարյանը:
Քաղաքագետը հավելեց, որ ավելին, նշված քայլը Թուրքիայի համար կազուսային իրավիճակ է ստեղծել: Անդրադառնալով պատմաբանների հանձնաժողովի շուրջ Ռեջեփ Թաիփ Էրդողանի հայտարարությանը, Կարեն Բեքայանն ընդգծեց. «Պետք է արձանագրել, որ չկա կամք կամ նրանք դեռեւս չեն կիրառում որոշակի արձագանքի մեխանիզմ: Ուստի պատմաբանների հանձնաժողովի մասին հին երգն են երգում »: Այլ հարց է, որ մենք պետք է ուշադիր լինենք Թուրքիայի գործողությունների նկատմամբ;
Հիշեցնենք, որ Ադրբեջանի նախագահի հետ հանդիպման ժամանակ Էրդողանը հայտարարել է, թե Գալիպոլիի ճակատամարտի 100-ամյակի առթիվ ապրիլի 24-ին կլինեն միջոցառումներ եւ Թուրքիա կհրավիրվեն աշխարհի տարբեր երկրների առաջնորդներ։ Սերժ Սարգսյանը պատասխանել է միջոցառմանը մասնակելու Էրդողանի նամակին: Նախագահի նամակում, մասնավորապես, ընդգծվում է. « Դեռեւս մի քանի ամիս առաջ հրավիրել եմ Ձեզ Երեւան՝ 2015 թվականի ապրիլի 24-ին միասին հարգելու Հայոց ցեղասպանության անմեղ նահատակների հիշատակը: Մեզ մոտ ընդունված չէ հյուրընկալվել հրավիրվողին՝ առանց սեփական հրավերի պատասխանը ստանալու»: