«Արարատի մարզի Մարմարաշեն գյուղում պատանուն պարտքի դիմաց առեւանգած Տիտոն նորմալ անձնավորություն է»,- այս մասին NEWS.am-ի թղթակցի հետ զրույցում ասաց Մարմարաշենի գյուղապետ Էդվարդ Հակոբյանը:
Նա նշեց, որ Տիտոյի իսկական անունը Մայիս է, վերջինս եզդիական համայնքի ներկայացուցիչ է, ֆերմեր, ամուսնացած է: «Այդ երեխայի ծնողերը Տիտոյին մեծ պարտք ունեն՝ մոտ 700-800 հազար դրամ, երեխայի հայրը նրա մոտ է աշխատում՝ որպես բանվոր, նա անընդհատ օգնել է նրանց, հաց, սնունդ, գումար է տվել, պարտքը չեն վերադարձել, ամեն անգամ ասել են՝ այսօր-վաղը, երեւի մի քիչ ջղայնացած է եղել, ասել է՝ մինչեւ պարտքս չտաք, չեմ տա երեխուն, տարել է երեխուն իր տուն, պահել, բայց ոչ մի վնաս չի տվել, կերցրել-խմցրել, չայ է տվել, իրիկունը էլ տարել են»,-ասաց գյուղապետը:
Նա նշեց, որ այդ ընտանիքը Սյունիքի մարզի Գորիս քաղաքից է, շատ պարտքեր ունի տարբեր մարդկանց եւ գյուղում գտնվող խանութներին:
Հիշեցնենք, որ երեկ Արարատի մարզի Մարմարաշեն գյուղում ուշագրավ միջադեպ է տեղի ունեցել: NEWS.am-ին հայտնի է դարձել, որ գյուղի բնակիչներից մեկը, ոմն Տիտո, առեւանգել է համագյուղացու 15-ամյա որդուն` սպառնալով, որ որդուն կվերադարձնի այն ժամանակ, երբ ծնողները տան իր պարտքը:
Երեկ երեկոյան ծնողները դիմել են իրավապահներին եւ ողջ օրվա որոնողական աշխատանքների արդյունքում հաջողվել է հայտնաբերել պատանուն: Առեւանգողին բերման են ենթարկել ոստիկանության բաժին: Վերջինիս տանն էլ հայտնաբերել էին երեխային:
Դեպքը NEWS.am-ի զրույցում հաստատել են ոստիկանությունից` նշելով, որ նախապատրաստվում են նյութեր: