2014թ.-ը ԶԼՄ-ների գործունեության համար բարդ ժամանակաշրջան էր. տարին աչքի է ընկել իշխանության տարբեր կառույցների եւ դրանց ներկայացուցիչների կողմից իրականացված խոսքի ազատության սահմանափակման փորձերով, լրատվամիջոցների եւ լրագրողների նկատմամբ կիրառված ճնշումներով եւ խոչընդոտներով:
Այսօր` հունվարի 30-ին, Խոսքի ազատության պաշտպանության կոմիտեի նախագահ Աշոտ Մելիքյանը ամփոփ ներկայացրեց ուսումնասիրության արդյունքները:
«Բավական է հիշել, թե ինչ սահմանափակումներ էին փորձում մտցնել իշխանության տարբեր կառույցները, մասնավորապես` ֆեյքերի մասին տխրահռչակ օրինագիծը, կամ իրավապահ մարմինների պահանջը` բացահայտելու տեղեկատվության աղբյուրը` խախտելով «Զանգվածային լրատվության մասին» ՀՀ օրենքը: Անցած տարին մտահոգիչ էր նրանով, որ Հայաստանում արձանագրվեցին լրագրողների նկատմամբ բռնություններ»,- ասաց Աշոտ Մելիքյանը:
Ըստ վիճակագրական տվյալների` անցած տարի արձանագրվել է լրագրողների նկատմամբ ֆիզիկական բռնության 9 դեպք, ԶԼՄ-ների եւ նրանց աշխատակիցների նկատմամբ ճնշումների 43 փաստ, տեղեկատվություն ստանալու եւ տարածելու իրավունքի խախտման 13 դեպք: 2014թ.-ին տարբեր դատարաններում վարույթ է ընդունվել ԶԼՄ-ների գործունեությանն առնչվող 22 նոր հայց: Դրանցից 17-ը վերաբերում է վիրավորանքին եւ զրպարտությանը, 3-ը` հեղինակային իրավունքի պաշտպանությանը, 1-ը` տեղեկատվության աղբյուրը բացահայտելուն, 1-ն էլ այլ բնույթի:
