Հայաստանի վարչապետ Հովիկ Աբրահամայանը սկսել է հանդիպումը փոքր բիզնեսի ներկայացուցիչների հետ, որոնք հունվարի 30-ի առավոտից կրկին բողոքի ակցիա են անցկացնում կառավարության շենքի մոտ: Վարչապետի հանձնարարությամբ՝ 15 ցուցարարների, որոնց ընտրել են հենց հավաքվածները, թույլ են տվել կառավարության շենք մտնել։
Հանդիպման սկզբում վարչապետը հետաքրքրվեց՝ արդյոք առեւտրի բոլոր ոլորտների ներկայացուցիչները ներկա են հանդիպմանը՝ խնդիրների շրջանակը առավել ընդգրկուն դարձնելու համար: Առեւտրականների հետ միասին վարչապետի մոտ են բարձրացել նաեւ «Փոքր ձեռնարկությունների հայկական միությունն» (Ստեփան Ասլանյան), «Ավտոներկրողների պաշտպանության լիգա» (Տիգրան Հովհաննիսյան) ՀԿ-ների ղեկավարները:
Ներքեւում մնացած առեւտրականները չեն հեռանում եւ պատասխան են պահանջում. թեեւ հանդիպումը սկսվել է մի քանի րոպե առաջ, նրանք արդեն վանկարկում են՝ «պատասխան»:
Հիշեցնենք, որ փետրվարի 1-ից ուժի մեջ մտնող «Շրջանառության հարկի մասին» ՀՀ նոր օրենքով առաջարկվում է փոքր եւ միջին բիզնեսի ներկայացուցիչների համար շրջանառության հարկի դրույքաչափը 3,5 տոկոսից նվազեցնել 1 տոկոսի, միաժամանակ, տնտեսավարողները պարտավորվելու են գործունեություն ծավալել հստակ փաստաթղթաշրջանառությամբ: Օրենքն ուժի մեջ պետք է մտներ 2014 թվականի նոյեմբերից 1-ից, սակայն բողոքի ակցիաներից հետո օրենքի գործողության ժամկետը հետաձգվեց մինչեւ փետրվարի 1-ը։ Նոր փոփոխությամբ առաջին անգամ փաստաթուղթ չներկայացնելու դեպքում տնտեսվարողը նախազգուշացվելու է, երկրորդ անգամ՝տուգանվելու 20 հազար դրամով, երրորդ անգամ՝ շրջանառության հարկի 5 տոկոսի չափով: Ավելի վաղ գործադիրի ներկայացուցիչները նշում էին, որ օրենքն ուղղված է խոշոր բիզնեսին հարկային դաշտ բերելուն:
