ԵԱՀԿ Մինսկի խմբի համանախագահների վերջին հայտարարությունում հստակ տարբերակված են խնդիրը եւ կոչի հասցեատերը: Այս մասին հունվարի 30-ի մամուլի ասուլիսում հայտարարել է «Եվրոպական ինտեգրացիա» ՀԿ-ի ղեկավար, փորձագետ Կարեն Բեքարյանը՝ անդրադառնալով Կրակովում Ադրբեջանի արտգործնախարարի եւ համանախագահների հանդիպման արդյունքում տարածված հայտարարությանը:
«Ես չեմ հիշում նման հայտարարություն, որ Մինսկի խմբի համանախագահները հստակ տարբերակեին կողմերին՝ տարբեր կոչերով», - ընդգծել է նա:
Հիշեցնենք, որ Կրակովում Ադրբեջանի արտգործնախարար Էլմար Մամեդյարովի հետ հանդիպման ավարտին համանախագահների տարածած հայտարարությունում մասնավորապես ասված է. «Բռնության աճը, որը սկսվել է անցյալ տարվանից, պետք է դադարեցվի, վերականգնելու համար վստահությունը՝ ԼՂՀ խաղաղության գործընթացում աճ գրանցելու համար։ Մենք կոչ ենք անում Ադրբեջանին հավատարիմ մնալ հրադադարի պահպանման ռեժիմին։ Մենք կոչ ենք անում նաեւ հայկական կողմին՝ միջոցներ ձեռնարկել լարվածությունը նվազեցնելու ուղղությամբ: Բռնությունը ջնջում է հանուն խաղաղության գործադրվող ջանքերը»:
Այսպիսով, փաստորեն առաջին անգամ ԵԱՀԿ ՄԽ համանախագահները հրադադարի ռեժիմի խախտման պատասխանատու ուղղակիորեն անվանել են Ադրբեջանին:
