Պակիստան Շիկարփուր քաղաքում հունվարի 30-ին շիական մզկիթի պայթյունի հետեւանքով զոհվել է առնվազն 30 մարդ, շուրջ 70-ը՝ վիրավորվել. նրանցից մի քանիսի վիճակը ծանր է:
Պայթյունը տեղի է ունեցել ուրբաթ օրվա աղոթքի ժամանակ: Ոստիկանությունում կարծում են, որ պայթուցիկը գործարկել է մահապարտ ահաբեկիչը:
Ըստ տեղի մամուլի՝ պայթյունն այնքան ուժեղ է եղել, որ փլվել է մզկիթի տանիքը՝ մարդկանց արգելափակելով շենքի ներսում: Խմբավորումներից ոչ մեկն առայժմ չի ստանձնել կատարվածի պատասխանատվությունը, հայտնում է Lenta.ru-ն:
Պակիստանի պաշտոնատար անձինք, այդ թվում նաեւ երկրի նախագահ Մամնուն Հուսեյնը եւ վարչապետ Նավազ Շարիֆը դատապարտել են Շիկարփուրում կատարվածը: Պակիստանում եռօրյա սուգ է հայտարարվել:
