Խորհրդարանական ոչ իշխանական եռյակը որոշել է երկուշաբթի արտահերթ նիստ նախաձեռնել՝ «Շրջանառության հարկի մասին» նոր օրենքի քննարկման համար: Այս մասին հունվարի 30-ին խորհրդարանական եռյակի նիստի ավարտին հայտարարել է «Ժառանգություն» կուսակցության ղեկավար Ռուբեն Հակոբյանը:
Ըստ Հակոբյանի՝ խորհրդարանական երեք խմբակցությունները օրենքի դեմ բողոքող առեւտրականների կողմից են: «Ես երեք խմբակցությունների անունից լիազորված եմ հայտարարելու, որ մենք կսատարենք առեւտրականներին՝ օրենքի գործողությունը դադարեցնելու համար: Մենք խնդրում ենք քաղաքացիներին լինել ԱԺ շենքի առաջ՝ խորհրդարանի նիստի ընթացքում», - ասել է Հակոբյանը՝ նշելով, որ խորհրդարանական երեք խմբակցությունները մտադիր են հանդիպում խնդրել ԱԺ խոսնակի հետ՝ այս հարցի առնչությամբ:
Հիշեցնենք, «Շրջանառության հարկի մասին» նոր օրենքի համաձայն՝ փոքր եւ միջին բիզնեսի համար հարկային դրույքը 3,5%-ից նվազեցվել է 1%-ի: Միաժամանակ, առեւտրականները պետք է շրջանառության համապատասխան փաստաթղթեր ներկայացնեն համապատասխան մարմիններ, հակառակ դեպքում կտուգանվեն: Սակայն խոշոր բիզնեսի ներկայացուցիչները հաճախ փաստաթղթեր չեն տրամադրում փոքր եւ միջին ձեռնարկատերերին: