Հայաստանում անհրաժեշտ է աճեցնել խաղողի ֆիլոքսերակայուն տեսակներ: Այդ մասին այսօր՝ հունվարի 30-ին, կառավարության նիստին հայտարարել է գյուղատնտեսության նախարար Սերգո Կարապետյանը:
Նկատենք, որ կառավարության նիստին որոշում է ընդունվել Արմավիրի մարզի 4 գյուղերում ոչնչացնել ֆիլոքսերայի օջախները: Վարակված խաղողի այգիների ընդհանուր մակերեսը կազմում է 11,07 հա: Հիվանդության դեմ պայքարի համար կարող է հատկացվել մոտ 48,1 մլն դրամ (101 հազար դոլար), որոնցից 18,7 մլն-ը՝ վարակված խաղողի այգիների ոչնչացման համար (պայքարի միակ ճանապարհը), 289,4 մլն-ը՝ հատկացում այգեպաններին, քանի որ այդ այգիները 3 տարի շարունակ չպետք է մշակվեն:
11,7 հա վարակված տարածքից 9,24-ը պատկանում է մենատնտեսներին, մնացածը՝ հայկական ծագմամբ արգենտինացի միլիարդատեր Էդուարդ Էռնեկյանին պատկանող«Տիերաս դե Արմենիա» ընկերությանը: Ընկերությունը գինին արտադրում է մի քանի տարի առաջ տնկված սեփական խաղողի այգիներից: Հասարակի գյուղացիների խաղողի այգիները կոչնչացվեն, իսկ միլիարդատիրոջ այգիները անձեռնմխելի կմնան:
Արարատյան դաշտը երկար ժամանակ զերծ է եղել ֆիլոքսերայից հավելեց գյուղատնտեսության նախարարը. վարակման օջախը հայտնաբերվել է 2009թ.Գայ գյուղում: Ընդ որում նախարարը չհիշատակեց, որ հիվանդությունը սկսվել է տարածվել Էռնեկյանի ֆիլոքսերակյուն այգիների հիմնումից հետո. դրանք դիմացկուն են հիվանդության նկատմամբ, սակայն հարուցիչներ են արտադրում:
Այսպիսով, կառավարությունը որոշել է չմաքրել այգիները հիվանդությունից, այլ «լավ, թե վատ» հարմարվել դրան: