Ֆրանսիական դեղագործական «Serviette» կոնցեռնը մոտակա 5 տարիների ընթացքում Հայաստանին շաքարախտի դեմ դեղ կմատակարարի:
Այս մասին այսօր՝ հունվարի 30-ին, կառավարության նիստին հայտարարեց ՀՀ առողջապահության նախարար Արմեն Մուրադյանը:
Նա նշեց, որ ընկերությունը ոչ միայն ներկայացրել է ամենացածր գնային հայտը (1 տուփի համար 1.8 եվրո կամ 0.06 եվրո (42.3 դրամ) հաբի համար), այլ նաեւ համաձայնել է մատակարարումների 10%-ը տրամադրել անվճար՝ որպես մարդասիրական օգնություն:
Հատկանշական է, որ ֆրանսիացիները առաջարկեցին ավելի ցածր գին, քան հայկական ընկերություններից մեկը, որն առաջարկում է հնդկական արտադրության համանման դեղ:
Նախարարը հիշեցրեց, որ Հայաստանում հաշվվում է մոտ 80 հազար շաքարախտով հիվանդ, որոնցից 12 հազարը ստանում է ինսուլին, որը ներկրվում է մեկ այլ հայտնի դանիական «Novo Nordisk» ընկերության կողմից:
