Երեւանում մարտի 18 – 20-ին կկայանա Հայոց ցեղասպանության 100-րդ տարելիցին նվիրված միջազգային մեդիաֆորում՝ «Արարատի ստորոտին» խորագրով: Այս մասին Ցեղասպանության թանգարան-ինստիտուտում հունվարի 30-ին Մեծ եղեռնի 100-րդ տարելիցին նվիրված մամուլի ասուլիսում հայտարարել է ՀՀ նախագահի աշխատակազմի ղեկավար Վիգեն Սարգսյանը:
«Մենք հիմա աշխատում ենք տարածաշրջանային տարբեր հանձնաժողովների հետ, որպեսզի ապահովենք տարբեր երկրների ազդեցիկ լրատվամիջոցների ներկայությունը», - ասել է նա: Ապրիլի 22 – 24-ը, ըստ Սարգսյանի, կլինեն միջոցառումների կիզակետը, կկայանա միջազգային հանրային, քաղաքական ֆորում՝ «Ցեղասպանության հանցագործության դեմ», - նշել է նախագահի աշխատակազմի ղեկավարը:
Ապրիլի 23-ի երեկոյան կկայանաավանդական ջահերով երթ: Նույն օրը Հայ առաքելական եկեղեցին Ցեղասպանության զոհերին կդասի սրբերի շարքը: Ըստ Վիգեն Սարգսյանի՝ շատ կարեւոր է այն, որ եկեղեցին զոհերի հստակ թիվ չի արձանագրի, քանի որ սրբադասումը հավաքական բնույթ է կրում: Ապրիլի 23-ին Ազատության հրապարակում տեղի կունենա «System of a Down» ռոք խմբի համերգը: «Մենք գիտենք, որ խումբը պայքարում է Հայոց ցեղասպանության ճանաչման եւ դատապարտման համար: Մենք որոշել ենք, որ ճիշտ կլինի, որպեսզի մշակույթի ոլորտում պահանջը նրանք հնչեցնեն: Մինչ այդ խումբը կանցկացնի 16 համերգ՝ աշխարհի տարբեր քաղաքներում, այդ թվում՝ Լոնդոնում, Ամստերդամում, Մոսկվայում: Համերգի ողջ շրջագայությունը կրում է «Արթնացնենք հոգիները» («Wake the souls») խորագիրը», - ասել է նա:
Օտարերկրյա պատվիրակությունների այցից եւ «Ծիծեռնակաբերդ» հուշահամլիրում ցեղասպանության զոհերի հիշատակը հարգելուց հետո, ըստ Վիգեն Սարգսյանի, ապրիլի 24-ի երեկոյան տեղի կունենա միջազգային սիմֆոնիկ նվագախմբի համերգը, որտեղ հանդես կգան երաժիշտներ Հայոց ցեղասպանությունը ճանաչած երկրներից: Նվագախումբը կատարելու է հայ կոմպոզիտորների ստեղծագործություններ: «Միջոցառման ընդհանուր անվանումն է «Վերածնունդ»: Սկիզբը 20:15-ին է, որը խորհրդանշում է 2015թ.», - նշել է Հայոց ցեղասպանության 100-ամյա տարելիցի միջոցառումների համակարգողը: