Հունվարի 30-ին ՀՀ սփյուռքի նախարությունում կայացավ Լրագրողների համահայական համաժողովները համակարգող մարմնի հերթական նիստը, որը վարում էր համակարգող խորհրդի նախագահ Շահան Քանդահարյանը:
Նիստին մասնակցում էին համակարգող մարմնի անդամներ ԵՊՀ ժուռնալիստիկայի ֆակուլտետի դեկան Ն. Մարտիրոսյանը, ՀՀ ժուռնալիստների միության նախագահ Աստղիկ Գեւորգյանը, ՀՀ սփյուռքի նախարարության պատասխանատու աշխատակիցներ:
Նիստին հեռակապով միացել էին նաեւ Իրանի «Ալիք» օրաթերթի գլխավոր խմբագիր Դերենիկ Մելիքյանը, Չեխիայի «Օրեր» ամսագրի գլխավոր խմբագիր Հակոբ Ասատրյանը, Լիբանանի «Խոսնակ» ամսագրի գլխավոր խմբագիր Համբիկ Մարտիրոսյանը եւ գրող, հրապարակախոս Հակոբ Վարդիվառյանը (ԱՄՆ):
Ողջունելով նիստի մասնակիցներին՝ ՀՀ սփյուռքի նախարար Հրանուշ Հակոբյանը մասնավորապես նշեց. «Ուրախ եմ ողջունել այսքան վաստակաշատ լրագրողների. դուք ներկայացնում եք այն ամրոցը, որը կոչվում է տեղեկատվական ցանց: Հատկապես այս տարի դուք շատ մեծ անելիք ունեք, եւ ձեր գործունեությունը, հրապարակումներն ու աշխատանքները պետք է բխեն Հայոց ցեղասպանության 100-րդ տարելիցի միջոցառումները համակարգող հանձնաժողովի կողմից երեկ ընդունված համահայկական հռչակագրի տառին ու ոգուն: Որքան ակտիվ ու գործունյա եղաք, այնքան ուժեղ կդիմադարձեք թուրք-ադրբեջանական քարոզչությանն ու կեղծարարությանը: 2015թ. ակնկալում եմ, որ դուք միասնական կլինեք եւ ձեր բոլոր ջանքերը համակարգված կներդնեք այդ ուղղությամբ»:
Քննարկվեցին նիստի օրակարգում ընդգրկված հարցերը՝ «Հայոց ցեղասպանության 100-րդ տարելիցին ընդառաջ՝ լավագույն հրապարակում» անվանակարգով մրցանակաբաշխության անվանակարգերի եւ չափորոշիչների հստակեցումը, Հայոց ցեղասպանության 100-րդ տարելիցին նվիրված միջոցառումների լուսաբանումը տարածաշրջանային մամուլում եւ Լրագրողների 7-րդ համաժողովում հնչած առաջարկություններին վերաբերող հարցեր: