ԵԱՀԿ ՄԽ նախկին համանախագահ, ադրբեջանամետ դիրքորոշմամբ հայտնի Ադրբեջանում ԱՄՆ-ի նախկին դեսպան Մեթյու Բրայզան կարեւոր է համարում ղարաբաղյան բանակցային գործընթացում ԱՄՆ-ի դերի ակտիվացումը, նաեւ՝ Ադրբեջանին աջակցելը։
«Կովկասի բանբեր»-ի հետ զրույցում նախկին համանախագահը հայտարարել է, որ Վաշինգտոնը բավականաչափ չի հետաքրքրվում այդ խնդրով, եւ ամերիկյան ղեկավարությանը կոչ է արել Ադրբեջանի եւ Հայաստանի նախագահներին քաղաքական աջակցություն երաշխավորել՝ բանակցություններում բեկումնային պահի հասնելու համար։
«Կամ էլ ԱՄՆ-ի նախագահը պետք է ժամանակ առ ժամանակ անմիջական հանդիպումներ ունենա նախագահներ Ալիեւի եւ Սարգսյանի հետ, ինչպես անում էր Դմիտրի Մեդվեդեւը նախագահ եղած ժամանակ։ Միաժամանակ, նախագահ Օբաման պետք է հրապարակավ ցույց տա, որ այդ հակամարտությունը կարեւոր է ԱՄՆ-ի համար։ Թեեւ, ըստ իս, Օբաման հակամարտություններ շատ ունի, եւ ամենակարեւորն այն է, որ կողմերից մեկն ինչ-որ քայլ անի, որը ցույց կտար, որ Ադրբեջանի եւ Հայաստանի նախագահները պատրաստ են լուրջ փոխզիջումների։ Սա, ի դեպ, կարող է գրավել ԱՄՆ-ի նախագահի ուշադրությունը», - նշել է նա։
Բրայզան նաեւ հավելել է, որ ղարաբաղյան հակամարտության եւ դրա կարգավորման հանդեպ հետաքրքրությունը կարելի է արթնացնել նաեւ այլ միջոցներով։ «Ադրբեջանական սփյուռքը, ինչպես եւ թուրքականը, կարող է ավելի ակտիվ դեր կատարել այս հարցում եւ ԱՄՆ-ում կարծիք ձեւավորել։ Դա լավ կլինի, բայց դեռ բավարար չէ։ Իսկ եթե օրինակ Բաքուն կամ Երեւանը կամ երկու կողմերը միաժամանակ ինչ-որ քայլեր անեն եւ նախագահները հայտարարեն, որ պատրաստ են անմիջական բանակցություններ վարել, դա շատ դրական աղմուկ կբարձրացնի, որը կգրավի Ամերիկայի բարձրաստիճան պաշտոնյաների ուշադրությունը», - վստահ է ԱՄՆ-ում Ադրբեջանի նախկին դեսպանը։
Միաժամանակ Բրայզան հայտարարել է, որ վաղ թե ուշ ամերիկացի առաջնորդները խոստովանում են, որ Ադրբեջանի նկատմամբ կան ռազմավարական շահեր եւ դրանք պետք է պաշտպանել։ «Եթե Օբաման խոսում է իր ռազմավարական շահերը պաշտպանելու մասին՝ օգնելով Սաուդյան Արաբիային, ինչո՞ւ նույնը չանի Ադրբեջանի պարագայում», - առաջարկել է դիվանագետը։ Ընդհանուր առմամբ, ըստ նրա, ԱՄՆ-ն Հարավային Կովկասին չափազանց քիչ ուշադրություն է դարձնում. «Ես կարծում եմ՝ այստեղ խիստ հարկավոր է ԱՄՆ-ի ռազմավարությունը, իսկ դրա առաջին քայլը պետք է դառնա Հարավային Կովկասում Ամերիկայի շահերը որոշելը», - ընդգծել է Բրայզան։