AirAsia ինքնաթիռի անձնակազմը աղետից մի փոքր առաջ կարող էր անջատել բորտային համակարգիչը, հաղորդում է Bloomberg-ը՝ վկայակոչելով հետաքննությանը մոտ աղբյուրներին: Reuters-ի տվյալներով՝ բորտային համակարգի անսարքությունը նկատվել էր ավիաաղետից դեռ մեկ շաբաթ առաջ:
Ինչպես հայտնում է Bloomberg-ը համակարգիչը վերաբեռնելու անհաջող փորձից հետո օդաչուներն այն անջատել են: Այդ քայլը չի խոչընդոտել օդանավի շահագործմանը, սակայն արդյունքում հանվել է պաշտպանությունը, որը օդաչուին թույլ չի տալիս ինքնաթիռը դուրս բերել վտանգավոր ռեժիմներ:
Reuters-ի փոխանցմամբ՝ ավիաաղետը տեղի է ունեցել այն բանից հետո, երբ երկրորդ օդաչուն շատ կտրուկ բարձրություն է հավաքել: Այդ պահին «ոչ ստանդարտ ընթացակարգ» իրականացնող անձնակազմի հրամանատարը թեեւ զբաղեցրել է իր տեղը, սակայն չի հասցրել ուղղել սխալը, հաղորդում է Lenta.ru-ն:
Ավելի վաղ Ինդոնեզիայի տրանսպորտի անվտանգության ազգային կոմիտեն հաղորդել էր, որ աղետից անմիջապես առաջ օդանավի ղեկը սկսել է վարել երկրորդ օդաչուն:
Հիշեցնենք, որ մալազիական Airbus-ը 2014 թվականի դեկտեմբերի 28-ի վաղ առավոտյան ինդոնեզական Սուրաբայա քաղաքից չվերթ էր իրականացնում դեպի Սինգապուր: Թռիչքից կարճ ժամանակ անց այն անհետացել է ռադարների էկրաններից: Օդանավում գտնվող բոլոր 162 մարդիկ զոհվել են: Ներկայումս ծովից դուրս է բերվել նրանցից 70-ի մարմինը: