Անցած տարի մայրաքաղաքում բնակարանների առքուվաճառքի գործարքների թիվը տարեկան կտրվածքով ավելացել է 30,1%-ով: Այսպիսին են պաշտոնական տվյալները: Գնողունակ պահանջարկի նման ցնցող աճը կարող էր հանգեցնել այդ պահանջարկի օբյեկտի համարժեք թանկացմանը: Սակայն պաշտոնական շուկայական գները գործնականում չեն փոխվել: Երեւանի բնակարանների մակերեսի 1 քմ-ի համար հաշվարկված պարզ միջին հանրահաշվական գինը մեկ տարվա ընթացքում ավելացել է ընդամենը… 0,1%-ով:
Ինչպես հայտնի է, Հայաստանում դեկտեմբերը նշանավորվեց ԱՄՆ դոլարի փոխարժեքի վայիվերումներով: Անցած տարվա դեկտեմբերի համեմատությամբ՝ համաշխարհային արժույթը 14,4%-ով ամրապնդել է իր դիրքերը: Այս աճը սենսացիոն անակնկալ էր: Նոյեմբերի 1-ից մինչեւ 30-ը դոլարի փոխարժեքն արդեն հասցրել էր ավելանալ 5,5%-ով, ընդ որում, հետագա աճը լիովին կանխատեսելի էր:
Գաղտնիք չէ, որ անշարժ գույքի զգալի մասը, հատկապես՝ մայրաքաղաքում, գնահատվում եւ վաճառվում է դոլարով, այլ ոչ թե դրամով: Ուստի համաշխարհային արժույթի թանկացման գործոնը բնակարանների շուկայում կարող էր փոխել իրավիճակը: Հանուն ֆինանսական օգուտի (այսինքն, ընտանեկան բյուջեի համալրման) իրենց բնակարանները ծախող սեփականատերերը լիովին կարող էին նվազեցնել գները դոլարով:
Բոլորը քաջտեղյակ են, որ անշարժ գույքի հայկական շուկայում վաճառողներն ավելի շատ են, քան գնորդները: Ընդ որում, անշարժ գույքի առաջարկի աճը շատ առումով «ապահովվում է» բնակչության արտագաղթով: Պաշտոնական տվյալներով՝ Հայաստանում մշտական բնակչության թիվը կրճատվել է 6,5 հազարով:
Բացի այդ, գրանցվել է նաեւ հարաբերականորեն բնական հավելաճ՝ 15,3 հազար մարդ: Ստացվում է, որ միայն մեկ տարվա ընթացքում մոտ 22 հազար մարդ լքել է երկիրը(ընդմիշտ կամ մեկից ավելի տարի բացակայել են երկրից): Պայմանականորեն դա կազմում է մոտ 5,5 հազար ընտանիք: Նրանց մի մասը, անկասկած, վաճառել է իր անշարժ գույքը՝ դրանով իսկ ավելի խախտելով անշարժ գույքի շուկայում առաջարկի ու պահանջարկի հավասարակշռությունը: Իսկ երբ պահանջարկի ստագնացիայի դեպքում առաջարկն ավելանում է, ապա գները նվազում են
Վերջին երկու տարիների այդ միտումները բացարձակապես չեն արտացոլվել Անշարժ գույքի կադաստրի պետական կոմիտեի պարբերաբար հրապարակվող տեղեկատվությունում: Սակայն եթե այդ «գները» դրամից վերածենք դոլարի, ապա ստացվում է, որ անցած տարվա դեկտեմբերին բնակարանների արժեքը շոշափելիորեն նվազել է: Օրինակ մայրաքաղաքի ստանդարտ մակերեսով (63 քմ) բնակարանը «էժանացել է» միանգամից 5.5 հազար դոլարով:
