Ավտոտնակում լկտիաբար հարձակվեց վրաս, մոտիկացավ, անպատվեց, հայհոյեց, տապոռ էր, չաքուջ էր, խփեցի գլխին, ընկավ ու սպանվեց: Այս մասին իր ինքնախոստովանական ցուցմունքուն հայտնել է որդու՝ 47-ամյա Գերման Ոսկանյանի սպանության մեջ մեղադրվող նրա հայրը՝ Կարապետ Ոսկանյանը:
Այս պատմությունը բաժանվում է մի քանի մասերի: Առաջինը՝ որդու անհետանալու մասին հայտարարությունն էր ոստիկանության բաժնում: Հենց այդ փուլում էլ ի հայտ են գալիս հակասություններ ցուցմունքներում, մասնավորապես՝ Գերման Ոսկանյանի անհետանալու հանգամանքների շուրջ: Երկրորդ մասը վերաբերում է գործի բացահայտմանը, երրորդը՝ Գերման Ոսկանյանի գլխին բազմաթիվ վնասվածքներով դին, ինչպես նաեւ հանցագործության գործիք կացինը հայտնաբերելուն:
Ավելի վաղ հայտնել էինք, որ Երեւանի Շենգավիթ համայնքի Արտաշիսյան փողոցի 39 շենքի բնակիչ Կարապետ Ոսկանյանը հունվարի 25-ի երեկոյան ոստիկանության Շենգավիթի բաժնում հայտարարություն էր տվել որդու` 47-ամյա Գերման Ոսկանյանի անհայտ կորելու մասին: Հայրը ոստիկաններին հայտնել էր, որ որդին նույն օրը իրենց շենքի բակում հանդիպել է ազգությամբ ռուս երեք անծանոթ երիտասարդների, նրանց հետ մեկնել անհայտ ուղղությամբ եւ այլեւս տուն չի վերադարձել:
Ոստիկանության Երեւան քաղաքի վարչության եւ Շենգավիթի բաժնի քրեական հետախույզների ձեռնարկած օպերատիվ-հետախուզական եւ որոնողական աշխատանքների արդյունքում` հունվարի 27-ին Արտաշիսյան փողոցի 39 շենքի բակում տեղակայված, Ոսկանյաններին պատկանող ավտոտնակի հորում, հողով ծածկված, հայտնաբերվել է Գերման Ոսկանյանի դիակը` գլխի մասում բազմակի վնասվածքների հետքերով:
Նույն օրը իր բնակարանից, սպանությունը կատարելու կասկածանքով, ոստիկանության Շենգավիթի բաժին բերման է ենթարկվել Գերման Ոսկանյանի հայրը` 1940 թ. ծնված Կարապետ Ոսկանյանը:
Նա խոստովանական բացատրություն է տվել, որ հունվարի 25-ին, ժամը 17.00-ի սահմաններում, իրենց շենքի բակում գտնվող, իրեն պատկանող ավտոտնակում կացնով մի քանի անգամ հարվածել է որդու գլխին, սպանել նրան եւ հանցագործության հետքերը թաքցնելու նպատակով` դիակը նետել կարտոֆիլի հորը եւ հողով ծածկել: Հետո գնացել է ոստիկանություն եւ տղայի անհայտ կորելու մասին ստահոդ հայտարարություն տվել:
Հանցագործության գործիք կացինը հայտնաբերվել է:
Կարապետ Ոսկանյանը ձերբակալվել եւ հանձնվել է նախաքննական մարմնին:
ՀՀ քրեական օրենսգրքի 104 հոդվածի 1-ին մասի հատկանիշներով հարուցված քրեական գործի նախաքննությունը շարունակվում է:
Մանրամասները՝ տեսանյութում