Հունվարի 31-ին ՀՀ ՊՆ վարչական համալիրում անցկացվել է կենտրոնական ապարատի ղեկավար կազմի խորհրդակցություն: Հեռահաղորդակցության միջոցների եւ տեսակապի շնորհիվ խորհրդակցությանը ներգրավված էր նաեւ պաշտպանության բանակի եւ բանակային զորամիավորումների հրամկազմը:
Պաշտպանության նախարար Սեյրան Օհանյանի գլխավորությամբ անցկացված խորհրդակցությունը նվիրված էր հունվար ամսվա ընթացքում զինված ուժերում կատարված աշխատանքների, առաջիկա անելիքների եւ հատկապես շտկման կարիք ունեցող բացթողումների ու դրանց վերացման ուղիների քննարկմանը:
Հանդիպման ընթացքում ամփոփվեցին առաջնագծում եւ մշտական տեղակայման վայրերում անձնակազմի զգոնության ու կարգապահության բարձրացման, հանկարծակի ստուգումների, մարտական եւ զորահավաքային պատրաստականության, զորքերի մարտական պատրաստության, մարտական հերթապահության, գնումների գործընթացի բարելավման ուղղությամբ իրականացված աշխատանքները:
Նոր ուսումնական փուլի մեկնարկին ընդառաջ` նախարար Սեյրան Օհանյանն անդրադարձ կատարեց նաեւ դրա շրջանակում անցկացվելիք միջոցառումները պատճաշ կազմակերպելու հարցերին:
Խորհրդակցության ընթացքում եւս մեկ անգամ ընդգծվեց որ անցած մեկ ամսվա ընթացքում, իբրեւ նախորդ ամիսների շարունակություն, իրականացվել են զինված ուժերի պատրաստության պլանով նախատեսված բոլոր միջոցառումները:
Հանձնարարականների եւ հարցադրումների տեսքով անդրադարձ կատարվեց նաեւ պաշտպանության ռազմավարական վերանայման գործընթացի շրջանակում 2015թ. կատարվելիք աշխատանքներին, որոնց վերաբերյալ առավել ընդգրկուն զեկույց ներկայացրեց ՀՀ պաշտպանության նախարարի առաջին տեղակալ Դավիթ Տոնոյանը: