Արցախում այսօր՝ հունվարի 31-ին, ծեծի ենթարկված՝ «Հիմնադիր խորհրդարանի» անդամներ Մխիթար Ավետիսյանն ու Քերոբ Ղազարյանը տեղափոխվել են Ստեփանակերտի բժշկական կենտրոն, որտեղ այս պահին հետազոտվում են: Այս մասին NEWS.am-ին ասաց «Հիմնադիր խորհրդարանի» անդամ Վարուժան Ավետիսյանը:
«Մխիթար Ավետիսյանի վիճակը ծանր է: Նա ուղեղի ցնցում է ստացել, բացի դրանից՝ նրա մոտ կասկածում են ներքին արյունահոսություն, փայծաղի վնասվածք: Այս պահին նա հետազոտվում է, իսկ Քերոբը համեմատաբար լավ վիճակում է»,- ասաց Վարուժան Ավետիսյանը:
Ծեծի ենթարկված 3-րդ անձը՝ լրագրող Անուշավան Շահնազարյանն առաջին բուժօգնություն է ստացել «Գորիս» բժշկական կենտրոնում, այնուհետեւ դուրս գրվել:
«Անուշավանի գլուխը պատռված է եղել, կարել են, ուսն է վնասվել, ամենայն հավանակությամբ, կոտրվածներ ունի»,- ավելացրեց Վարուժան Ավետիսյանը:
Նշենք, որ ավելի վաղ «Հիմնադիր խորհրդարանի» անդամ Վարուժան Ավետիսյանը NEWS.am-ի հետ զրույցում հայտնել էր, որ իրենց վրա հարձակվել է «ոստիկանական կարգախումբ՝ մոտ 60 հոգի»։ «Հիմնադիր խորհրդարանը» Արցախ էր մեկնել՝ ավտոերթ իրականացնելու եւ «100-ամյակն առանց ռեժիմի» նախաձեռնության մասին իրազեկելու: