Քալիֆորնիայի Գլենդել քաղաքում հայ փաստաբանը, որը զրկվել էր արտոնագրից գողության, փողերի լվացման եւ կեղծիքի համար, կրկին ձերբակալվել է, երբ այս ամիս երեք անգամ ներկայացել է դատարան՝ կեղծ արտոնագիր օգտագործելու համար։

«GlendaleNewsPress»-ի փոխանցմամբ, 38-ամյա Արմեն Գեկչյանին երեք դրվագներով մեղադրանք է ներկայացվել կեղծ արտոնագրի եւ անձնական տվյալներ կեղծելու համար։

Լոս Անջելես շրջանի դատախազության տվյալներով, Գեկչյանը դատարան է ներկայացել հունվարի 15-ին, 21-ին եւ անցած չորեքշաբթի՝ օգտագործելով արտոնագրված փաստաբանի տվյալները, որը նույն անուն-ազգանունն է ունեցել։ Նրան ձերբակալել են չորեքշաբթի Վան-Նայսի Գերագույն դատարանի շենքում։

Արմեն Գեկչյանը ավարտել է Հարավային Քալիֆորնիայի համալսարանը, արտոնագրից զրկվել էր 2012թ.։ Նախօրեին նա դատարանում իրեն մեղավոր չի ճանաչել առաջադրված մեղադրանքում։ Հետաքննությունը շարունակվում է։