ԱՄՆ-ն կշարունակի Ռուսաստանի նկատմամբ ճնշումը՝ միաժամանակ տնտեսական աջակցություն ցուցաբերելով Ուկրաինային եւ Կիեւի նախաձեռնած բարեփոխումներին: CNN հեռուստաալիքին տված հարցազրույցում այս մասին հայտարարել է ԱՄՆ նախագահ Բարաք Օբաման: Նա նաեւ Պուտինին մեղադրել է այն բանում, որ նա որոշակի դիրքորոշում է հայտնում, սակայն «նրա գործողություններն այլ բանի մասին են խոսում»:
«Մենք նախկինի պես տեսնում ենք, որ անջատականներին ֆինանսավորում եւ պատրաստում է Ռուսաստանը, որը նրանց համար ռազմավարական պլանավորումը նույնպես Մոսկվան է իրականացնում եւ ռուսական զորքերն աջակցում են նրանց: Եվ մենք դեռեւս Կրեմլին չենք լսել այն փաստի ընդունոմը, որ տվյալ խնդրի լուծումը երկարաժամկետ հեռանկարում ռուսական շահերից է բխում»,- հայտարարել է Օբաման: Նա նաեւ հավելել է, որ ելնելով այդ հանգամանքից՝ ԱՄՆ-ն «այսպիսի «երկկողմ» կուրս է վարելու. այսինքն՝ ուժեղացնելու է Ռուսաստանի նկատմամբ ճնշումն ու ամրապնդելու է Ուկրաինան՝ պարոն Պուտինին հասկացնելու համար, որ մենք դեռեւս կարող ենք հետ կանգնել այդ ճանապարհից եւ ամեն ինչ լուծել դիվանագիտական ճանապարհով»:
Օբաման հիշեցրել է, որ ԱՄՆ-ն ուժեղացնում է Ռուսաստանի հետ սահմանակից ՆԱՏՕ-ի անդամ պետություններին: «Եվ ես հստակ նշել եմ, որ այդ գիծն անցնել չի կարելի, քանի որ մենք ստիպված կլինենք մեր դաշնակիցներին պաշտպանելու համար ռազմական միջոցների դիմել»,- հայտարարել է ամերիկյան նախագահը:
Նա, միաժամանակ, առանձնապես լավատես չէ, որ Պուտինը կփոխի իր դիրքորոշումը՝ «մասամբ այն պատճառով, որ քաղաքականության մեջ նա առանձնապես հաջողության չի հասել»:
«Ինձ թվում է՝ նրան դա հաջողվեց հիմնականում պետության կողմից ֆինանսավորվող լրատվամիջոցների, ռուսական հեռուստաալիքների եւ իր ձեռքի տակ եղած այլ միջոցների շնորհիվ, որոնց նպատակը երկրում այլախոհությունը ճնշելն է: Նրան նաեւ հաջողվեց օգտվել Ռուսաստանում տարածվող ազգայնական տրամադրություններից: Այդպիսով, նա կարողացավ պահպանել իր վարկանիշը»,- հայտարարել է Բարաք Օբաման: