Հայաստանի Կառավարությունը 910 հազար  դոլար (շուրջ 4.5 մլրդ դրամ) կհատկացնի փոքր եւ միջին բիզնեսի  հաշվիչ դրամարկղային ապարատների սուբսիդավորման համար։ Այս մասին փետրվարի 5-ին Կառավարության նիստի ժամանակ հայտարարել է ֆինանսների փոխնախարար Վախթանք Միրումյանը։ Նրա խոսքով՝ խոշոր բիզնեսը նոր ապարատները գնում է ինքնարժեքով, իսկ փոքր բիզնեսին օգնելու համար կտրամադրվի պետական արտոնություն։

Հիշեցնենք, որ 2015թ. հունվարի 1-ից փոքր եւ միջին բիզնեսը պետք է ամբողջովին անցներ հաշվիչ դրամարկղային նոր ապարատների, որոնց ինքնարժեքն ավելի թանկ է, եւ որոնք ֆիքսում են ոչ միայն ապրանքի գինը, այլեւ ապրանքների բաշխումը։ ԱԱՀ-ով աշխատող շուրջ 8 հազար առեւտրային ընկերություններ, որոնց տարեկան շրջանառությունը 58.35 մլն դրամից ավել է, արդեն ձեռք են բերել նոր ապարատներ։ Հաջորդիվ եւս 42 հազար առեւտրականներ, որոնց տարեկան շրջանառությունը ցածր է այդ սահմանագծից, ձեռք են բերելու այդ  նոր ապարատները։

Խոշոր բիզնեսի համար ապարատները կարժենան 370 000 դրամ։ Սուբսիդավորվածների հետ գնի տարբերությունը կփոխհատուցի Կառավարությունը։ Տարեկան 30-58.3 մլն դրամ շրջանառություն ունեցող միջին եւ փոքր բիզնեսը  մինչեւ օգոստոսի 1-ը պետք է նոր ապարատները ձեռք բերի 150 հազար դրամով։ 10-30 մլն դրամ շրջանառություն ունեցող բիզնեսը՝ մինչեւ հոկտեմբերի 1-ը 120 հազար դրամով, իսկ 10 մլն-ից պակաս շրջանառություն ունեցող բիզնեսը՝ մինչեւ դեկտեմբերի 1-ը 80 հազար դրամով։