«ԱրմենՏել» ընկերությունը (ապրանքանիշը Beeline) դարձել է ՀՀ Սփյուռքի նախարարության կողմից իրականացվող «Արի տուն» ծրագրի գործընկեր: Մասնավորապես ընկերությունն ապահովում է «Արի Տուն» ծրագրի մասնակից սփյուռքահայ երիտասարդների հասանելիությունը միմյանց եւ ծրագրի կազմակերպիչների հետ:
Ինչպես NEWS.am-ը տեղեկանում է «ԱրմենՏելից», Ընկերության Գլխավոր տնօրեն Իգոր Կլիմկոն այս առնչությամբ մասնավորապես ասել է. «Արմենտելը» բարձր է գնահատում սփյուռքի նախարարության կողմից իրականացվող հայ ժողովրդի միավորմանն ուղղված բոլոր ծրագրերը: Երիտասարդները մեր ապագան են, եւ ես համոզված եմ, որ նման ծրագրերի իրականացումը հետագայում իր ազդեցությունը կունենա հայ ազգի լուսավոր ապագա կերտելու գործընթացում»:
Ծրագիրի տեւողությունը 6 ամիս է: «Արի տուն» ծրագրին կմասնակցեն սփյուռքահայ շուրջ 600 երիտասարդներ Իրանից, Վրաստանից, Ռուսաստանից, Գերմանիայից, ԱՄՆ-ից, Եգիպտոսից, Սիրիայից Թուրքիայից եւ այլ երկրներից:
Հիշեցնենք, որ 2009 թ-ին «Արի Տուն» համահայկական ծրագրի շրջանակում «ԱրմենՏել» ընկերության աջակցությամբ կազմակերպվել են բազմաթիվ հանդիպումներ եւ իրականացվել մի շարք ծրագրեր հայրենիք ժամանած սփյուռքահայ երիտասարդների համար: Հայաստան-Սփյուռք գործակցության ամրապնդման գործում ներդրած նշանակալի ավանդի համար «ԱրմենՏել» ընկերության գլխավոր տնօրեն Իգոր Կլիմկոն արժանացավ ՀՀ Սփյուռքի նախարարության պատվոգրի:
Նկատենք, որ թեեւ ծրագիրը կոչվում է «Արի տուն» սակայն այն չի նախատեսում սփյուռքահայերի վերադարձ: Ծրագիրը նախատեսում է միայն սփյուռքահայ երիտասարդների տուրիստական այցելություն Հայաստան, որից հետո նրանք վերադառնում են իրենց տները` արտասահման: