Մավրիտանացի ռեժիսոր Աբդերահման Սիսակոյի «Տիմբուկտու» ֆիլմը արժանացել է ֆրանսիական «Սեզար» կինոմրացանակի։ Կրոնական մոլեռանդների վայրագ ռեժիմի մասին պատմող ժապավենը 8 անվանակարգում 7 մրցանակ է շահել։ Այս մասին հաղորդում է Agence France-Presse-ը։
Ֆիլմը հաղթող է ճանաչվել «Լավագույն ձայն», «Ֆիլմի լավագույն երաժշտություն», «Լավագույն օպերատորական աշխատանք» «Լավագույն մոնտաժ» եւ «Լավագույն օրիգինալ սցենար» անվանակարգերում։ Իսկ Սիսակոն ճանաչվել է լավագույն ռեժիսոր՝ դառնալով այս մրցանակին արժանացած Աֆրիկայի առաջին ներկայացուցիչը։ Իր ելույթի ընթացքում ռեժիսորը հայտարարել է, որ ինքը ցանկացել է ցույց տալ, թե ինչպես են Մալիի հնագույն քաղաքի բնակիչները պայքարում իրենց գոյատեւման համար 2012թ. ջիհադիստների՝ իշխանության գալուց հետո, գրում է Lenta-ն։
Տղամարդու լավագույն դերակատարման համար մրցանակը շնորհվել է 25-ամյա Պիեռ Նինեին («Իվ Սեն Լորան»)։ «Լավագույն կանացի դեր» անվանակարգում հաղթող է ճանաչվել Ադել Էնելը («Կործանիչները»)։ Երկրորդ պլանի լավագույն դերասանուհի անվանակարգում մրցանակը տրվել է Քրիստեն Ստյուարտին («Զիլս Մարիա»)։ Կինոարվեստում ունեցած մեծ վաստակի համար պատվարժան «Սեզար»-ը շնորհվել է ամերիկացի դերասան Շոն Փենին։