Հայոց ցեղասպանության վերաբերյալ փետրվարի 19-ին շվեդական ռադիոյով հարցազրույց է հեռարձակվել պրոֆեսոր Օվե Բրինգի հետ, որը հանդիսանում է միջազգային իրավունքի ասպարեզում Շվեդիայի հեղինակավոր մասնագետներից մեկը եւ ցեղասպանությունների թեմայով բազմաթիվ մենագրությունների եւ հրապարակումների հեղինակ է։
Պրոֆեսոր Բրինգը ներկայացրել է Հայոց ցեղասպանության տարիներին Օսմանյան Թուրքիայում տիրող իրավիճակը՝ ընդգծելով, որ երկրի կառավարությունն ուներ կայսրության տարածքում ապրող հայ եւ այլ քրիստոնյա փոքրամասնությունների միաձուլման խնդիր, ինչն իրականացվել է բնաջնջման ճանապարհով՝ օգտվելով Առաջին համաշխարհային պատերազմի պայմաններում ստեղծված իրավիճակից։
Ներկայացվել է Ցեղասպանության ընթացքը` ընդգծելով դրա փուլային բնույթը, ինչի արդյունքում նախ ձերբակալվել եւ սպանվել է հայ մտավորականությունը, որից հետո տեղահանվել եւ գաղթի ճանապարհին բնաջնջվել է բնակչության մյուս հատվածը՝ հիմնականում կանայք, երեխաներ եւ տարեցներ։ Համեմատականներ անցկացնելով այլ ցեղասպանությունների հետ՝ պրոֆեսոր Բրինգը նշել է, որ փուլային բնույթ են կրել նաեւ Հոլոքոստը, Կամբոջայում տեղի ունեցած ցեղասպանությունը եւ այլ զանգվածային բնաջնջումներ։
Օվե Բրինգն ընդգծել է, որ այն, ինչ կատարվել է հայերի հետ Օսմանյան կայսրությունում, ցեղասպանություն էր, այլ ոչ թե ուղղակի տեղահանում, քանի որ տեղահանումը ենթադրում է մարդկանց խմբի վերաբնակեցման կազմակերպում, նախապես անհրաժեշտ պայմանների ստեղծում եւ բնակավայրերի պատրաստում։ Շարունակելով իր խոսքը՝ պրոֆեսորը նշել է, որ հակառակ դրան` հրամայված էր գաղթի ճանապարհին որքան հնարավոր է շատ հայերի սպանել։
Ավարտելով իր խոսքը` Օվե Բրինգը նշել է, որ տարբեր հաշվարկներով Ցեղասպանության տարիներին սպանվել է 1-1.5 մլն մարդ, կան 1916թ. հրապարակված տվյալներ մոտ 900 հազար սպանվածների վերաբերյալ, ինչպես նաեւ բազմաթիվ վկայություններ: «Ցեղասպանության արդյունքում է, որ ներկայումս հայերը սփռված են ամբողջ աշխարհով մեկ», - շեշտել է պրոֆեսորը։