Ազգային ժողովի ՀԱԿ խմբակցության ղեկավար Լեւոն Զուրաբյանն առաջարկում է ստեղծել համապատասխան հանձնաժողով՝ քննարկելու ներքաղաքական իրավիճակը, մասնավորապես Գագիկ Ծառուկյանի եւ ԲՀԿ թիմի նկատմամբ կիրառված որոշումները:
«Պարոն Սահակյան, մենք միամիտ չենք, եւ դուք՝ որպես ՀՀԿ թիմի անդամ, աջակցել եք Սերժ Սարգսյանին եւ ՀՀԿ որոշումներին, որոնք կիրառվեցին Գագիկ Ծառուկյանի եւ ԲՀԿ թիմի նկատմամբ: Վերանալով այդ արձանագրումից եւ դիտարկելով ձեզ ԱԺ նախագահի դերում՝ մենք համարում ենք, որ Ազգային ժողովի անհետաձգելի քննարկման առարկա պետք է դառնար Գագիկ Ծառուկյանի եւ ԲՀԿ-ի նկատմամբ Սերժ Սարգսյանի անձնական մասնակցությամբ սանձազերծված ահաբեկչական գործողությունները, հակասահմանադրական հարձակումները: Սա գրոհ է մեր սահմանադրական ազատություններին»,- այսօր՝ փետրվարի 23-ին, խորհրդարանում հայտարարեց Լեւոն Զուրաբյանը:
ԱԺ փոխնախագահ Էդուարդ Շարմազանովը, սակայն, ընդհատեց Զուրաբյանին՝ հայտարարելով, որ «սա մտքերի փոխանակման վայր չէ»:
«Գագիկ Ծառուկյանի թիմն ունի մի ողջ խմբակցություն եւ Ծառուկյանը Ձեր խոսնակության կարիքը չունի: Դուք հարցը տվեք»,- ասաց Շարմազանովը:
ՀԱԿ խմբակցության ղեկավարն առաջարկեց ստեղծել հանձնաժողով՝ ստեղծված իրավիճակը քննարկելու համար:
Պատասխանելով ընդդիմադիր պատգամավորի հարցին՝ ԱԺ նախագահը հայտարարեց. «Ձեր մտքերի հետ համաձայն չեմ, առավել եւս ձախողված վրեժխնդրությունը թատերաբեմ չի կարող դարձնել Ազգային ժողովը»: