Գյումրիում սպանված Ավետիսյանների ընտանիքի հարազատներն այսօր՝ փետրվարի 23-ին, գնացել են Շիրակի մարզի դատախազություն, մտել դատախազ Րաֆֆի Ասլանյանի սենյակ, որտեղ պահանջում են հանդիպել կամ հեռախոսով խոսել գլխավոր դատախազ Գեւորգ Կոստանյանի հետ եւ նրանից ստանալ հետաքննությանը վերաբերող իրենց հարցերի բոլոր պատասխանները:
NEWS.am-ի թղթակիցը հաղորդում է, որ հարազատները խիստ վրդովված են, նրանք աղմկում են եւ հրաժարվում են դուրս գալ Ասլանյանի սենյակից:
«Դուք մեր դատախազն եք, հենց հիմա զանգեք գլխավոր դատախազին ու ասեք, որ մենք ունենք պահանջներ եւ դուրս չենք գա այնքան ժամանակ, մինչեւ որ չստանանք պատասխանները»,- ասում են հարազատները:
Րաֆֆի Ասլանյանը նրանց խորհուրդ տվեց գրավոր դիմել Կոստանյանին. «Ի՞նչ ա, դառախազին կանչենք Շիրակի մարզ, դուք դա ճի՞շտ եք համարում»:
Հիշեցնենք, որ Ավետիսյանների քառասունքին հարազատները լրագրողներին ասել էին, որ այլեւս չեն պատրաստվում լռել եւ դիմելու են ծայրահեղ միջոցների, եթե հստակ տեղեկություններ չստանան քննության ընթացքի վերաբերյալ:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել հիվանդանոց, սակայն դեպքից 7 օր անց հիվանդանոցում մահացել էր նաեւ նա: Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Հունվարի 21-ին Պերմյակովին մեղադրանք են առաջադրել նաեւ հայ քննիչները՝ ՀՀ Քրեական օրենսգրքի 104-րդ հոդվածի 2-րդ մասի (դասալքություն՝ ծառայողական զենքով): Սպանության փաստով քրգործ է հարուցվել նաեւ ՀՀ Քննչական կոմիտեում: Հայաստանի Գլխավոր դատախազ Գեւորգ Կոստանյանը փետրվարի 3-ին նամակով դիմել էր Ռուսաստանի գլխավոր դատախազ Յուրի Չայկային՝ Ավետիսյանների ընտանիքի սպանության գործի վարույթը Հայաստանի իրավապահ մարմիններին փոխանցելու վերաբերյալ միջնորդությամբ:
