«Լոս Անջելեսի միջազգային օդանավակայաններ» հաստատությունը խզում է ավելի քան 845 հազար դոլարի պայմանագիրը «Gephardt Government Relations» ֆիլմայի հետ, որը գործում է որպես Թուրքիայի գրանցված օտարերկրյա գործակալ եւ նպաստում է Հայոց ցեղասպանության ժխտողականությանն ուղղված ջանքերին: Այս մասին NEWS.am-ին տեղեկացրեցին Արեւմտյան Ամերիկայի Հայ դատի հանձնախմբի մամուլի ծառայությունից:
Անցյալ տարեվերջին կազմակերպությունը քաղաքապետ Էրիկ Գարսետտիին կոչ էր արել խզել Լոս Անջելեսի կապերը նախկին կոնգրեսական, Հայոց ցեղասպանության ժխտողականության հայտնի ջատագով Դիք Ջեֆարդտի հետ, ինչպես նաեւ դադարեցնել «Լոս Անջելեսի միջազգային օդանավակայաններ» քաղաքային հաստատության հետ պայմանագրի գործունեությունը, որը ղեկավարվում է 7 հոգանոց խորհրդի կողմից:
Արեւմտյան Ամերիկայի Հայ դատի հանձնախմբի ղեկավար Նորա Հովսեփյանը ողջունում է այս որոշումը: «Դիք Ջեֆարդտը Կոնգրեսից հեռանալուց հետո, որտեղ ջանասիրաբար փորձում էր հասնել Հայոց ցեղասպանության մասին բանաձեւերի նախագծերի ընդունման, հիմա դարձել է վճարվող լոբբիստ: Այժմ բոլորովին հակառակ դիրք բռնելով՝ նա հսկայական փողեր է ստանում թուրքական կառավարությունից, որպեսզի իր նախկին գործընկերների շրջանում քարոզի դեմ հանդես գալ Հայոց ցեղասպանության հարց շուրջ արդարության հասնելու գործում: Որպես Հայոց ցեղասպանությունը ժխտող անձ՝ նա արժանի չէ Լոս Անջելեսի քաղաքացիներից ստացվող ոչ մի դոլարի, եւ չպետք է որեւէ կապ ունենա մեր մեծ ազգի հետ»,- ասել է նա:
Ավելի վաղ NEWS.am-ը հայտնել էր, որ ԱՄՆ-ի հայերին ներկայացնող կազմակերպությունների կոալիցիան ավելի քան 200 նամակ է ուղարկել ձեռնարկություններին, համալսարաններին եւ ոչ կառավարական կազմակերպություններին, որոնք համագործակցում են լոբբիստական հինգ ընկերությունների հետ: Դրանք ներկայում աշխատում են Թուրքիայի օգտին՝ Հայոց ցեղասպանության ժխտման նպատակով: Նամակներում կոչ է արվում, որպեսզի ընկերություններն այդ ֆիրմաներից պահանջեն դադարեցնել թուրքական կառավարության հետ պայմանագրերը՝ կապված այդ երկրի կողմից Հայոց ցեղասպանության ժխտողականության ջանքերի ակտիվացման հետ: Եթե ֆիրմաները հրաժարվեն խզել Թուրքիայի հետ հարաբերությունները, ապա ընկերություններին կոչ կարվի դադարեցնել դրանց հետ պայմանագրերի գործունեությունը:
