Լինելու են այնպիսի որոշումներ, որոնք շատերի համար կարող են անսպասելի լինել: Այս մասին NEWS.am-ին ասաց ԱԺ ԲՀԿ խմբակցության պատգամավոր Վահան Բաբայանը:
«Մոտակա օրերին հասարակությունը կտեսնի, որ ԲՀԿ խմբակցությունն ու կուսակցությունը շարունակելու է իր գործունեությունը բնականոն հունով: Այն, ինչ խոսվում է, քննարկվում է, իրականում ընդհանրապես կապ չունի մեր այս իրականության հետ: ԲՀԿ-ն ասելիքներ ունի եւ հասարակության համար հուզող հարցերի պատասխաններն ամեն դեպքում առաջիկա օրերին կտա»,- ասաց Վահան Բաբայանը:
Նրա խոսքով՝ լինելու են անսպասելի որոշումներ: Մեր հարցին, թե կոնկրետ ում համար են «անսպասելի» լինելու այդ որոշումները, ԲՀԿ-ական պատգամավորը պատասխանեց. «Քաղաքականության մեջ առաջնահերթ խնդիրը մեր ընտրողներն են, եւ կարծում եմ, որ ԲՀԿ-ն, լինելով երկրորդ քաղաքական ուժը Հայաստանում, իր ընտրողին ասելիքներ պետք է ունենա եւ հետեւողական պետք է լինի նաեւ իր նախընտրական ծրագրի իրագործման շրջանակում»:
Նշենք, որ նախագահ ՍերԺ Սարգսյանը փետրվարի 12-ին ՀՀԿ խորհրդի նիստում ունեցած ելույթի ժամանակ հայտարարել էր, որ Գագիկ Ծառուկյան քաղաքական դերակատարը երկրի համար դարձել է չարիք։ Նա նաեւ Ծառուկյանին ազատել է Ազգային անվտանգության խորհրդի անդամի կարգավիճակից, խոստացել, որ գործընթաց է սկսվելու Ծառուկյանի՝ ԱԺ նիստերից պարբերաբար բացակայելու կապակցությամբ։ Մեկ օր անց Ծառուկյանը հանդես եկավ հայտարարությամբ՝ նշելով, որ իրենք գնում են իշխանափոխության: Սակայն փետրվարի 17-ին տեղի ունեցած Սարգսյան-Ծառուկյան հանդիպումից հետո ԲՀԿ առաջնորդը նորից հայտարարությամբ հանդես եկավ՝ նշելով, որ հանրահավաքը չեղյալ է համարվում: Առ այսօր ԲՀԿ-ն ոչ մի հայտարարություն չի արել հետագա քայլերի վերաբերյալ: Միայն փետրվարի 23-ին խորհրդարանում ԱԺ ԲՀԿ խմբակցության քարտուղար Նաիրա Զոհրաբյանը հայտարարեց, որ իրենք բոյկոտում են ԱԺ քառօրյա նստաշրջանը: