Թուրքիան պաշտոնական հայտարություն չտարածեց Հայաստանի նախագահի կողմից արձանագրությունները երկրի խորհրդարանից հետ կանչման հետ կապված, ինչը վկայում է, որ Թուրքիային այլեւս չեն հետաքրքրում հայ-թուրքական արձանագրությունները։ Այս մասին, այսօր՝ փետրվարի 24-ին, լրագրողների հետ հանդիպմանը հայտնեց թուրքագետ Անդրանիկ Իսպիրյանը։

Իսպիրյանը նշեց, որ ակնկալվում էր, որ Հայաստանի նախագահի կողմից արձանագրությունների հետ կանչումը արձագանք կունենա Թուրքիայի իշխանությունների մոտ, սակայն հետագա զարգացումները ցույց տվեցին Թուրքիայի անտարբերությունն այդ հարցում։

«Հայաստանի նախագահի հայտարարությունից հետո թուրքական կողմից հնչել է 2 կարծիք, այն էլ լրագրողների հարցերին ի պատասխան։ Թուրքիայի ԱԳՆ մամուլի խոսնակ Թանժու Բիլգիչը հայտարարել էր, թե Հայաստանի քայլը համարում է ապակառուցողական, իսկ ԱԳ նախարար Մեւլութ Չավուշօղլուն ընդհանրապես գնահատական չէր տվել Հայաստանի քայլին՝ պնդելով, թե քանի «ադրբեջանական հողերը զավթված» են արձանագրությունների վավերացման մասին խոսք չի կարող լինել»,-նշեց թուրքագետը։

Ըստ թուրքագետի՝ վերջին 5-6 տարիներին հայ-թուրքական արձանագրությունների հայ-թուրքական հարաբերությունների շրջանակներում ամենակարեւոր քայլն էին։  «Թուրքական կողմից Հայաստանի որոշմանն ի պատասխան պաշտոնական հայտարարության չտարածելը վկայեց, որ Թուրքիային այլեւս չեն հետաքրքրում արձանագրությունները  եւ դրանք ժամանակին ստորագրվել էին ցուցադրական նպատակներով»-ամփոփեց Իսպիրյանը։