ԵԱՀԿ գործող նախագահ, Սերբիայի ԱԳ նախարար Իվիցա Դաչիչն այսօր հայտարարել է, որ ՄԱԿ-ի Անվտանգության խորհրդին Լեռնային Ղարաբաղի իրավիճակի մասին հաշվետվություն է ներկայացրել: Այս մասին հաղորդում է ԱՄՆ-ում NEWS.am-ի սեփական թղթակիցը:
«Ես առանձնապես մտահոգված եմ Լեռնային Ղարաբաղի վերջին իրադարձությունների առիթով: Չնայած անցյալ տարի Հայաստանի եւ Ադրբեջանի նախագահների միջեւ կայացած բանակցություններին, մենք իրավիճակի կտրուկ վատթարացում եւ քաղաքական գործընթացի դանդաղում ենք նկատում»,- հայտարարել է Դաչիչը:
Նրա խոսքով, ԵԱՀԿ-ում նախագահության ընթացքում Սերբիան շարունակելու է աջակցել Մինսկի խմբի համանախագահների ջանքերին՝ ուղղված բանակցային գործընթացի շարունակմանն եւ ուղիներ փնտրելուն, որոնք կարող են հանգեցնել հակամարտության երկարաժամկետ կարգավորման:
«Ես ստեղծված իրավիճակը քննարկել եմ Հայաստանի եւ Ադրբեջանի ԱԳ նախարարների հետ եւ մտադիր եմ շարունակել իմ ջանքերը նաեւ տարածաշրջանային առաջիկա այցի շրջանակում պետությունների ղեկավարների հետ հանդիպումների ընթացքում»,- նշել է ԵԱՀԿ գործող նախագահը: