Վրաստանի նախկին նախագահ Միխայիլ Սահակաշվիլին Ուկրաինան կոչել է «այժմյան Բեռլին»: Այս մասին գրում է The Washington Post-ը: Սահակաշվիլին ներկայում ղեկավարում է Ուկրաինայի նախագահ Պյոտր Պորոշենկոյին առընթեր Բարեփոխումների միջազգային խորհրդատվական խորհուրդը:
WP-ի համար գրած ակնարկում Սահակաշվիլին նշել է, որ Ուկրաինան Եվրոպայի խոշորագույն երկիրն է: Վրաստանի նախկին նախագահի խոսքով, ներկայում Ուկրաինայում որոշվում է, արդյո՞ք հետխորհրդային տարածաշրջանին թույլ կտան ազատվել «անարդյունավետության, կոռուպցիայի, բռնության եւ ձախող կառավարությունների արատավոր շրջանից» եւ ժամանակակից, բաց, ժողովրդավար հասարակություն կառուցել:
Ըստ Սահակաշվիլիի, Ուկրաինան պետք է բոլոր քաղաքացիների համար տնտեսական աճի եւ ժողովրդավարական բարեփոխումների առումով գրավիչ երկրի հաջողակ մոդել դառնա, ինչպես ժամանակին Արեւմտյան Բեռլինն էր «փարոս» Արեւելյան Բեռլինի բնակիչների եւ նրա սահմաններից դուրս ապրող քաղաքացիների համար: Ռուսաստանցիները կապ են զգում Ուկրաինայի եւ նրա ժողովրդի հետ, հաջողակ Ուկրաինան Ռուսաստանին կօգնի փոխվել դեպի լավը՝ ռուս ժողովրդին այլընտրանքային մոդելի հնարավորություն ընձեռելով: Բացի այդ, Վրաստանի նախկին նախագահը հայտարարել է Մոսկվայի դեմ տնտեսական հետագա պատժամիջոցների եւ պաշտպանական սպառազինությունների մատակարարման օգնությամբ Կիեւին աջակցելու անհրաժեշտության մասին:
Հոդվածի հեղինակը հավելել է, որ ուկրաինական բարեփոխումների հաջողությունը Եվրոպայում խաղաղությունը պաշտպանելու լավագույն հնարավորությունն է: Նրա խոսքով, Արեւմուտքը պետք է խոստովանի, որ Ուկրաինան «այսօրվա Արեւմտյան Բեռլինն» ու «ճակատի գիծն է»՝ «ռուսական ռեւանշիզմի» դեմ արեւմտյան արժեքները պաշտպանելու հարցում:
Ավելի վաղ հաղորդվում էր, որ Սահակաշվիլին Ռուսաստանը կոչել է «ագահ կոկորդիլոս»: