ՀՀԿ-ն երբեք առաջինը չի հարձակվում: Այս մասին, այսօր՝ փետրվարի 25-ին, ԱԺ-ում լրագրողների հետ զրույցում նշել է ԱԺ նախագահ, ՀՀԿ փոխնախագահ Գալուստ Սահակյանը:
Հարցին՝ ի՞նչ որոշման են եկել հանրապետականները՝ հրապարակավ հարձակումներ գործել անձամբ Գագիկ Ծառուկյանի դեմ, թե՝ ոչ, Սահակյանը պատասխանել է. «Պետք չի հարցերը նման արհամարհանքով տալ: ՀՀԿ ղեկավար Սերժ Սարգսյանը ամբողջական տեսակետ է հայտնել, եւ պետք չէ սեփական նկատառումներից ելնելով արտահայտություններն ընդհանուր կոնտեքստոից դուրս ներկայացնել»:
Նրա խոսքով՝ ՀՀԿ-ն միայն պատասխանում է հարձակումներին, երբեք առաջինը չի հարձակվում:
Նշենք, որ նախագահ ՍերԺ Սարգսյանը փետրվարի 12-ին ՀՀԿ խորհրդի նիստում ունեցած ելույթի ժամանակ հայտարարել էր, որ Գագիկ Ծառուկյան քաղաքական դերակատարը երկրի համար դարձել է չարիք։ Նա նաեւ Ծառուկյանին ազատել է Ազգային անվտանգության խորհրդի անդամի կարգավիճակից, խոստացել, որ գործընթաց է սկսվելու Ծառուկյանի՝ ԱԺ նիստերից պարբերաբար բացակայելու կապակցությամբ։
Մեկ օր անց Ծառուկյանը հանդես եկավ հայտարարությամբ՝ նշելով, որ իրենք գնում են իշխանափոխության: Սակայն փետրվարի 17-ին տեղի ունեցած Սարգսյան-Ծառուկյան հանդիպումից հետո ԲՀԿ առաջնորդը նորից հայտարարությամբ հանդես եկավ՝ նշելով, որ հանրահավաքը չեղյալ է համարվում:
Իսկ փետրվարի 23-ին ԲՀԿ-ն հայտարարել է ԱԺ նիստերը բոյկոտելու մասին: ԲՀԿ համագումարը կայանալու է մարտի 5-ին, որտեղ շատ հարցերի պատասխան կտրվի:
