Մարտական դիրքում փետրվարի 14-ին հրազենային վնասվածքի հետեւանքով մահացած կրտսեր սերժանտ Արման Օսիպյանի հարազատները չգիտեն, թե դեպքի օրն ինչ է տեղի ունեցել եւ ինչու է Արմանը մահացել:
NEWS.am-ի հետ զրույցում Արմանի հորեղբայրը՝ Կարո Օսիպյանը, վստահեցրեց, որ նա ծառայության ընթացքում ոչ մի խնդիր, բողոք չի ունեցել:
«Ընտիր ծառայություն է ունեցել, երբեք ոչ մի բանից չի բողոքել: Հենց իր նպատակն էր Ղարաբաղում ծառայելը: Ինքը ղարաբաղցու թոռ է, բայց երբեք Ղարաբաղում չէր եղել երբեք, դրա համար էլ շատ էր ուզում էնտեղ ծառայել: Գնաց, շատ ուրախ էր, բայց դե էսպես ավարտվեց ամեն ինչ»,- ասաց Կարո Օսիպյանը:
Նրա խոսքով՝ Արմանը մշտապես կապի մեջ է եղել ընտանիքի հետ, նրա ձայնի մեջ երբեք անհանգստություն չի նկատվել: Թե ինչ է եղել դեպքի օրը, հարազատները հստակ չգիտեն:
«Ոչ մի բան չգիտենք, չենք էլ ուզում խաբել, քննություն է ընթանում: Մի բան հաստատ է, որ մարմինի վրա բռնության ոչ մի հետք չկա, միայն կրակոցներն են»,- նշեց մահացած զինծառայողի հորեղբայրը:
Հիշեցնենք, որ դեպքի առթիվ ՀՀ ՔԿ զինվորական քննչական գլխավոր վարչությունում փետրվարի 14-ին հարուցվել է քրեական գործ՝ ՀՀ քրեական օրենսգրքի 365-րդ հոդվածի 3-րդ մասով (մարտական հերթապահություն կամ մարտական ծառայություն կրելու կանոնները խախտելը, որն առաջացրել է ծանր հետեւանքներ)։
Ավելի վաղ հայտնել էինք, որ փետրվարի 14-ին ժամը 04:40-ի, սահմաններում N մարտական դիրքում մարտական հերթապահություն կրելու կանոնները խախտելու հետեւանքով արձակված կրակահերթի արդյունքում հրազենային վնասվածքներ է ստացել նույն զորամասի ժամկետային զինծառայող, կրտսեր սերժանտ Արման Սերգեյի Օսիպյանը եւ մահացել։