Անկացրած հարցումների արդյունքները ցույց են տվել, որ Beeline-ը բարելավում է իր կապի ու սպասարկման որակը։ Այս մասին փետրվարի 26-ին լրագրողներին հայտարարեց «ԱրմենՏել»-ի (Beeline ապրանքանիշ) հաճախորդների սպասարկման որակի բարելավման նախագծի ղեկավար Շուշանիկ Ղալթախչյանը։
Նա նշեց, որ հեռախոսազանգերի կենտրոնների եւ սպասարկման գրասենյակների ծառայություններից օգտվող քաղաքացիների շրջանում sms հարցումները ավելի ու ավելի բարձր արդյունքներ են ցույց տալիս։ Ընկերությունը հարցումներն անցկացնում է «խորհուրդ կտայի՞ք ձեր հարազատներին եւ ընկերներին օգտվել Beeline-ի ծառայություններից» բանաձեւով, որպեսզի հասկանալի լինի, թե բաժանորդների որ մասի վրա է հնարավոր հույս դնել իբրեւ հնարավոր փրոմոութերի։
Փրոմոութեր հանած ոչ փրոմոութեր NPS բանաձեւով 2015թ. հունվարին ընկերությունն արդեն գրանցել էր 74 տոկոս ցուցանիշ սպասարկման գրասենյակներում եւ 63 տոկոս հեռախոսազանգերի կենտրոններում։ Հաշվարկը կատարվել է ավելի քան 5 հազար sms պատասխանների հիման վրա։
Բացի այդ, արդյունքները կարելի է դիտարկել առանձին աշխատակիցների դեպքում։ «Դրա համար մենք ստեղծել ենք NPS նշանը։ Եթե դուք մեր աշխատակիցներից որեւէ մեկի վրա տեսնեք այդ նշանը, իմացեք, որ բաժանորդները գոհ են այդ աշխատակցից»,- ընդգծել է Ղալթախչյանը։
Ընկերությունը ոչ միայն հաշվում է «լայքերը», այլեւ վերլուծում է դժգոհության պատճառները։ Մեկ օրվա ընթացքում ընկերությունը զանգում է բոլոր նրանց, ովքեր «սառը» կամ «տաք» գնահատականներ են դրել։ «Դրանից հետո մենք գործ ունենք պատճառների հետ։ Եթե հաճախորդը դժգոհ է սպասարկումից, աշխատում ենք գրասենյակների եւ կենտրոնների հետ, եթե սակագներից, քննարկում ենք նոր սակագնային պլանների հնարավորությունը, եթե ծածկույթից, ապա վերլուծում ենք հանրապետության տարածքում ծածկույթի հզորությունը, այդ թվում՝ տարածաշրջանում, որտեղից ստացել ենք դժգոհությունը»,- նշել է Ղալթախչյանը։
Հետադարձ կապի շնորհիվ ընկերությունը կրճատել է սպասումների ժամանակը սպասարկման գրասենյակներում եւ հեռախոսազրույցի սպասման ժամանակը հեռախոսազանգերի կենտրոններում, ինչպես նաեւ չեղյալ է հայտարարել հաշիվը լիցքավորելու ժամկետները։