Ազգային ժողովի «Բարգավաճ Հայաստան» խմբակցության պատգամավոր Ռուբեն Գեւորգյանի ղեկավարած Երդվյալ Ազատամարտիկների միությունն այսօր՝ փետրվարի 27-ին, նիստ է գումարել: Այս տեղեկությունը NEWS.am-ի թղթակցի հետ զրույցում հաստատեց ԵԱՄ ղեկավար Ռուբեն Գեւորգյանը:
Նա նշեց, որ նիստ է գումարվել, քննարկվել է մարտի 1-ին ՀԱԿ-ի հրավիրած հանրահավաքին մասնակցել, չմասնակցելու հարցը: Երդվյալ Ազատամարտիկների միությունը որոշում է կայացրել չմասնակցել հանրահավաքին: Հարցին, թե ինչո՞ւ է նման որոշում կայացվել, Ռուբեն Գեւորգյանը պատասխանեց, որ հանրահավաքներին, երթերին մասնակցելը կազմակերպության գործառույթներից եւ առաքելությունից դուրս է: Դիտարկմանը, թե այդ դեպքում ինչո՞ւ Գագիկ Ծառուկյանի հրավիրած հանրահավաքներին մասնակցել են, ԵԱՄ նախագահն այսպես հակադարձեց. «Մեր մասնակցությունը քաղաքական ոչ մի տարր չէր պարունակում, ընդամենը մեր միությանը անշահախնդիր կերպով ձեռք մեկնող Գագիկ Ծառուկյանին բարոյական դաշտում աջակցելու համար էր»: