Իրավիճակն Ուկրաինայում մեր օրերում գոյություն ունեցող միակ հակամարտությունն է, որը կարելի է լուծել, սակայն դրա համար կարող է տասնյակ տարիներ պահանջվել: Նման կարծիք է հայտնել Գերմանիայի ԱԳ նախարար Ֆրանկ Վալտեր Շտայնմայերը, գրում է գերմանական Deutsche Welle-ն՝ վկայակոչելով dpa գործակալությունը:
«Կարող է մի ողջ սերունդ պահանջվել՝ քաղաքական լուծման հասնելու համար: Բայց երբ նայում են երկրագնդին եւ պատկերացնում Սիրիայում, Լիբիայում եւ Իրաքում տիրող իրավիճակը, համարում եմ, որ ուկրաինական հակամարտությունը միակն է, որ կարող է լուծվել»,-նշել է դիվանագետը:
Ինչ վերաբերում է Դոնբասում շփման գծում կրակի դադարեցման եւ ծանր զրահատեխնիկան հետ քաշելու մասին պայմանավորվածություններին, Շտայնմայերը դա «լավ նորություն» է համարում, բայց ոչ «բեկում»:
Նրա կարծիքով՝ դա վկայում է այն մասին, որ ուկրաինական ճգնաժամը վերջապես հանգիստ փուլ է թեւակոխում, հաղորդում է «ՌԻԱ նովոստին»: