Մարտի 1-ին Հայաստանի սահմանապահ շրջաններ այցելելու «Ժառանգության» որոշումը նպատակ չունի մրցակցել Հայ ազգային կոնգրեսի հետ։ Այս մասին փետրվարի 27-ին խորհրդարանական ճեպազրույցի ժամանակ լրագրողներին հայտարարեց «Ժառանգություն» խմբակցության ղեկավար Ռուբեն Հակոբյանը։
Նրա խոսքով՝ այցելությունը պլանավորվել թր նախօրոք։ Կուսակցության անդամները սկզբում կայցելեն Վանաձոր, իսկ այնուհետեւ՝ երկրի հյուսիս-արեւելքում Ադրբեջանին սահմանակցող Նոյեմբերյանի եւ Բերդի շրջաններ։ «Այդ օրը հատուկ չի ընտրվել։ Մենք նախօրոք գրաֆիկ էինք կազմել, որի համաձայն՝ այդ օրերին պետք է լինեինք հյուսիսարեւելյան շրջաններում»,- վստահեցրեց Հակոբյանը։
Հիշեցնենք, որ 2008թ. փետրվարի 18-ի նախագահական ընտրություններից հետո ՀՀ առաջին նախագահ Լեւոն Տեր-Պետրոսյանի կողմնակիցները հավաքվել էին Ազատության հրապարակում եւ պահանջում էին ընտրությունների վերանայում: Նրանք 10 օր շարունակ շուրջօրյա հանրահավաքներ էին անցկացնում Ազատության հրապարակում: Մարտի 1-ի առավոտյան ոստիկանությունը ուժով ցրեց Ազատության հրապարակում հավաքվածներին, իսկ նույն օրը երեկոյան իշխանությունները հրազեն կիրառեցին անզեն ցուցարարների դեմ, որի հետեւանքով զոհվեց 10 քաղաքացի, այդ թվում երկու ոստիկան:
Մինչ օրս 10 զոհերի համար ոչ ոք պատասխանատվություն չի կրել:
ՀԱԿ-ը կիրակի պատրաստվում է ավանդական սգո հանրահավաք կազմակերպել։