«Մարտի 1»-ի զոհերից Արմեն Ֆարմանյանի հայրը՝ Վաչագան Ֆարմանյանը, պնդում է, որ այս տարիների ընթացքում նախկին ՀԱԿ անդամներ Նիկոլ Փաշինյանն ու Ալեքսանդր Արզումանյանը երբեք իր որդու շիրիմին չեն այցելել:
Այսօր՝ փետրվարի 27-ին, լրագրողների հետ հանդիպմանը Վաչագան Ֆարմանյանը հայտնեց, որ ՀԱԿ-ից ոչ բոլորն են պայքարում այս գործի բացահայտման համար:
«Նրանք, որոնք անջատվեցին ՀԱԿ-ից, ոչ վախենում եմ, ոչ էլ ամաչում եմ, տղայիս գերեզմանի տեղը չգիտեն, տան տեղը չգիտեն: Հանձինս՝ Նիկոլ Փաշինյանն ու Ալեքսանդր Արզումանյանը: Ես շատ խիստ վրդովված եմ: Ի՞նչն է պատճառը, թող ինձ բացատրի, մի պատճառ պիտի ունենա չէ՞: Քանի տարի է՝ ինքը դեպուտատ է, ես նրանից լավ բան չեմ լսել, չի էլ արտահայտվել»,- ասաց Վաչագան Ֆարմանյանը:
Արմեն Ֆարմանյանի հայրը Նիկոլ Փաշինյանին ու Ալեքսանդր Արզումանյանին համեմատեց Շավարշ Քոչարյանի եւ Արշակ Սադոյանի հետ:
«Իրեն պետք էր մտնել Ազգային Ժողով, մտան, բայց ումո՞վ մտան, իմ որդու արյունով չմտնեին ԱԺ ու իրենց անելիքն անեին: Ինձ հետաքրքրում էր, որ ինքը մինչեւ վերջ պետք է կանգներ մեր կողքին: Կարող է ինչ-որ ծնողի կողքը կանգնել է, բայց ես չեմ տեսել, իմ կողքին չեն եղել»,- ավելացրեց նա:
Հիշեցնենք, որ 2008թ. փետրվարի 18-ի նախագահական ընտրություններից հետո ՀՀ առաջին նախագահ Լեւոն Տեր-Պետրոսյանի կողմնակիցները հավաքվել էին Ազատության հրապարակում եւ պահանջում էին ընտրությունների վերանայում: Նրանք 10 օր շարունակ շուրջօրյա հանրահավաքներ էին անցկացնում Ազատության հրապարակում: Մարտի 1-ի առավոտյան ոստիկանությունը ուժով ցրեց Ազատության հրապարակում հավաքվածներին, իսկ նույն օրը երեկոյան իշխանությունները հրազեն կիրառեցին անզեն ցուցարարների դեմ, որի հետեւանքով զոհվեց 10 քաղաքացի, այդ թվում երկու ոստիկան:
Մինչ օրս 10 զոհերի համար ոչ ոք պատասխանատվություն չի կրել: