2015թ հունվար-փետրվարին Յունիբանկի միայն դրամով ներգրավված ավանդների ծավալն աճել է ավելի քան 2.3 մլրդ դրամով: Այս մասին լրագրողների հետ հանդիպմանը նշեց Յունիբանկի Վարչության նախագահի տեղակալ, Օպերացիոն սպասարկման եւ տեղեկատվական համակարգերի գծով տնօրեն Մեսրոպ Հակոբյանը:
Նա նաեւ հայտնեց, որ այս տարվա մարտին բանկը նախատեսում է բացել երկու նոր մասնաճյուղ: Մասնաճյուղերից մեկը գտնվում է Երեւանի կենտրոնում` Ա.Մանուկյանի փողոցում եւ տարբերվում է տեղեկատվական տեխնոլոգիաների հագեցվածությամբ, ինչը հնարավորություն է կտա բանկին ապահովելու սպասարկման նոր որակ` շեշտը դնելով սպառողական վարկավորման ընդլայնման վրա:
«Այսօր բանկային գործի զարգացման հիմնական ուղղությունը հաճախորդամետ քաղաքականությունն է: Այժմ բանկը ներկայացված է գլխամասային գրասենյակով եւ 46 մասնաճյուղերով: Բայց, մեր հաճախորդների թիվը գնալով աճում է` Յունիբանկը սպասարկում է մոտ 257 հազար հաճախորդի: Այնպես որ, արագ ու հարմարավետ սպասարկում իրականացնելու համար այս տարի եւս ծրագրել ենք մասնաճյուղային ցանցի ընդլայնում», - նշեց Մ.Հակոբյանը:
VIP-հաճախորդներին անհատական սպասարկում իրականացնելու նպատակով Յունիբանկը Երեւանի Կիեւյան 8, N63 հասցեում կբացի նոր, հարմարավետ գրասենյակ եւ կսկսի զարգացնել Private Bankging ուղղությունը: Unibank Privé ծառայությունների փաթեթը, որը առաջարկվելու է համապատասխան եկամուտ եւ կարգավիճակ ունեցող անձանց, ներառում է լիարժեք ֆինանսական լուծումներ` կապիտալի կառավարման համակարգված մոտեցում, արդյունավետ ֆինանսական պլանավորում եւ ներդրումային ռազմավարության մշակում: Հաճախորդը կարող է դառնալ Unibank Privé-ի մասնակից` ձեւակերպելով առնվազն 40 մլն ՀՀ դրամ գումարով կամ համարժեք արտարժույթով ավանդ կամ հաշվի չնվազող մնացորդ: Սպասարկման բոլոր փուլերում հաճախորդի հետ աշխատում է անհատական ֆինանսական մենեջեր, որը պատրաստ է աջակցություն ցուցաբերել ցանկացած հարցի դեպքում:
Յունիբանկը մշտապես առանձնացել է նաեւ նոր տեխնոլոգիաների ակտիվ կիրառմամբ` ներկայանալով որպես ժամանակակից, իննովացիոն բանկ: Բանկը նախատեսում է ձեռքբերել նոր սերվերային սենյակ, որը համապատասխանելու է անվտանգության եւ ապահովության ամենաբարձր TIER3 միջազգային ստանդարտին: Այդ նպատակով բանկը կհամագործակցի ռուսաստանյան հանրահայտ «Պրոտոբեյզ Լաբարատորիզ» ընկերության հետ: Այս տարվա ներդրումների մոտավոր ծավալը կկազմի 300 մլն դրամ:
