Մերձավոր Արեւելքում «Իսլամական պետության» ահաբեկչական գործողությունները կազմակերպված գործողություններ են, որոնք, համաձայն ցեղասպանության նախազգուշացման եւ դրա համար նախատեսված պատժի մասին 1948թ. ՄԱԿ-ի կոնվենցիայի, ասորիների դեմ ցեղասպանության վառ օրինակ են։ Այս մասին փետրվարի 27-ին խորհրդարանական ճեպազրույցների ժամանակ հայտարարեց Հայաստանի Գիտությունների ազգային ակադեմիայի աշխատակից, արեւելագետ, Չիկագոյի համալսարանի պրոֆեսոր, Հայաստանում ասորական համայնքի ներկայացուցիչ Անահիտ Խոսրոեւան։
Նա նշեց, որ ասորիները ջարդերի են ենթարկվում։ Նրանց ողջ-ողջ այրում են, գլխատում։ Բացի այդ, ոչնչացվում են ասորական պատմության վկայությունները։ «Այսօր «Իսլամական պետություն» ահաբեկչական խմբավորումը գոյատեւում եւ միլիոններ է վաստակում միայն նավթի շնորհիվ։ Այդ նավթը արտահանվում է սեւ շուկայի միջոցով, որի հետեւում կանգնած է միայն եւ միայն Թուրքիան։ Երբ 200 ասորի ընտանիք կանգնած էր Թուրքիայի եւ Սիրիայի սահմանին, Թուրքիայի Հանրապետությունն արգելեց ասորիների մուտքը իր տարածք, որպեսզի հնարավորություն չտա նրանց փրկվել ջարդերից»,- եզրափակեց արեւելագետը։
