Այն, ինչ կատարվում է Մերձավոր Արեւելքում, ողջ քրիստոնյա աշխարհի խնդիրն է։ Այս մասին փետրվարի 27-ին խորհրդարանական ճեպազրույցների ժամանակ հայտարարեց Հայաստանի ասորական համայնքի ներկայացուցիչ Ռազմիկ Խոսրոեւը։
Նրա խոսքով՝ տարածաշրջանից քրիստոնյաներին վտարելը ամենածանր հետեւանքները կունենա։ Նա ընդգծեց, որ արդեն ավելի քան 100 տարի, դրան են ձգտում Թուրքիան եւ իսլամական աշխարհը։ «Ասորի ժողովուրդն ուզում է, որ քրիստոնյա աշխարհն առաջին հերթին իր ձայնը բարձրացնի եւ դատապարտի Իրաքում եւ Սիրիայում իրականացվող քրիստոնյաների ցեղասպանությունը։ Մենք ոչ միայն Հայաստանի իշխանություններին, այլ նաեւ ողջ աշխարհին կոչ ենք անում կանխել այդ հանցագործությունը, քանի որ յուրաքանչյուր պատերազմ ցեղասպանություն է։ Ասորիները ցանկանում են, որ ողջ աշխարհը աջակցի Մերձավոր Արեւելքի եզդիներին, ասորիներին, հայերին։ Մենք գիտենք, թե ինչպես է Հայաստանը ընդունում սիրիահայերին։ Ես կցանկանայի, որպեսզի նմանատիպ որոշում կայացվեր նաեւ ասորիների համար»,- եզրափակել է Ռազմիկ Խոսրոեւը։