«Հիմնադիր խորհրդարանն» այլեւս չի մասնակցի 7 ուժերի հանդիպումներին, որը նախաձեռնել է ԱԻՄ առաջնորդ Պարույր Հայրիկյանը:
Այս առնչությամբ Հիմնադիր խորհրդարանի քարտուղարության հաղորդագրության մեջ նշվում է.
«Հիմնադիր խորհրդարանը տարբեր ձեւաչափերով խորհրդակցական հանդիպումներ է ունենում քաղաքական ուժերի հետ:
Նույն սկզբունքով Հիմնադիր խորհրդարանը մասնակցել է նաեւ ԱԻՄ առաջնորդ Պարույր Հայրիկյանի նախաձեռնած հանդիպումներին:
Հանդիպումները ցույց տվեցին, որ դրանց ընթացքը չի համընկնում Հիմնադիր խորհրդարանի ծրագրին:
Այդ պատճառով Հիմնադիր խորհրդարանը դադարեցնում է իր հետագա մասնակցությունը դրանց»:
Ավելի վաղ NEWS.am-ը հայտնէլ եր, որ արտախորհրդարանական մի շարք ուժեր այս օրերին ակտիվ քաղաքական քննարկումների եւ խորհրդակցությունների մեջ են: Հանդիպումների կազմակերպիչը ԱԻՄ նախագահ Պարույր Հայրիկյանն է:
Հայրիկյանը «ՀԺ»-ի հետ զրույցում հաստատելով քննարկումների անցկացման լուրը, ասել է, որ 7 ուժեր համատեղ հանդիպումներ են անցկացնում, ապա հայտարարել, որ այդ 7 ուժերն են՝ ԱԻՄ-ը, «Ժառանգությունը», ՀՀՇ-ն, «Ազատ դեմոկրատները», Հիմնադիր խորհրդարանը, Պահպանողական եւ «Ժողովրդավարական Հայրենիք» կուսակցությունները:
«Առաջարկ է եղել, որ հրավիրենք նաեւ Նիկոլ Փաշինյանի նախաձեռնությանը: Հանուն ճշմարտության պետք է ասեմ, որ խոսվել է նաեւ Հրանտ Բագրատյանին հրավիրելու մասին: 7 ուժերի 4 հանդիպում արդեն իսկ եղել է»,-հայտարարել է ԱԻՄ ղեկավարը»:
