Facebook-ի օգտատերերին, որոնք, իրենց իսկ կարծիքով, չեն համապատասխանում ներկայում առաջարկվող գենդերային նույնականացման 58 տարբերակներից ոչ մեկին, առաջարկվել է եւս մեկ տարբերակ. այդ բաժինն ինքնուրույն լրացնել: Այս մասին գրում է Associated Press-ը:
«Հիմա, եթե չեք կարողանում ընտրել ձեր գենդերային պատկանելությունն ընտրված ցանկից, կարող եք ձեր սեփական տարբերակն ավելացնել»,- ասված է կայքի գլխավոր էջում հրապարակված հայտարարության մեջ:
Ըստ Gazeta-ի, Facebook-ի տրանսսեքսուալ ծրագրավորող Արի Չիվուկուլան առաջիններից մեկն է օգտվել այդ հնարավորությունից: Նա կարծում է, որ նման փոփոխությունը կհանգեցնի այն մարդկանց ճանաչմանը, որոնք իրենց տղամարդ կամ կին չեն համարում: «Մենք կարծում ենք, որ այս քայլը կօգնի բաց երկխոսություն սկսել»,- հայտարարել է Չիվուկուլան:
2014 թվականի փետրվարին Facebook-ն ընդլայնեց գենդերային նույնականացման ցուցակը՝ ստանդարտ արականից եւ իգականից հասցնելով մինչեւ մի քանի տասնյակ այլ տարբերակների: Դրանք նույնպես հասանելի կլինեն օգտատերերին: