ԱՄՆ-ում Հայկական երիտասարդական դաշնության անդամները եւ նրանց համախոհները Բաքվի ջարդերի 25-րդ տարելիցի կապակցությամբ ակցիա են կազմակերպել Վաշինգտոնում Ադրբեջանի դեսպանատան մոտ՝ քննադատելու Ադրբեջանի հակահայկական ագրեսիվ քաղաքականությունը։ Մասնակիցները հանդես են եկել անկախ Լեռնային Ղարաբաղի Հանրապետության անկախության եւ անվտանգության կոչով։ Այս մասին NEWS.am –ին հայտնել են ԱՄՆ Հայկական երիտասարդական դաշնության մամուլի ծառայությունից։
«Վաշինգտոնի շրջանի հայերը Ամերիկայում ու ողջ աշխարհում մեր քույրերի եւ եղբայրների հետ կիսում են իրենց հիմնական պարտքը՝ հանդես գալ Արցախի ազատության համար եւ պայքարել Ադրբեջանի ագրեսիայի դեմ։ Մենք հպարտ ենք նրանով, որ այսօր պաշտպանում ենք մեր համայնքի արժեքները՝ անկախ ալիեւամետ հակաակցիայի մասնակիցների ատելությունից»,- ասաց Հայ երիտասարդական դաշնության «Անի» մասնաճյուղի ներկայացուցիչ Սեւան Սիմոնյանը։
Ադրբեջանի դեսպանատան աշխատակիցների մի փոքր խումբ իրենց կողմնակիցների հետ համատեղ բողոքի հակաակցիա էր կազմակերպել՝ վանկարկելով Ռամիլ Սաֆարովի անունը եւ փորձելով վախեցնել Հայկական երիտասարդական դաշնության կազմակերպած հիշատակի միջոցառման մասնակիցներին։
Հիշատակումից հետո Սուրբ Խաչ եկեղեցու հոգեւորական Սարգիս Ակթավուկյանը հավաքվածների ներկայությամբ աղոթք է կարդացել Բաքվի, Սումգայիթի, Կիրովաբադի եւ Մարաղայի զոհերի, ինչպես նաեւ Լեռնային Ղարաբաղում պատերազմի ժամանակ զոհվածների հիշատակին։