Կոտայքի մարզի Արագյուղի տներից մեկից մոտ 650 հազար դրամի շինարարական եւ էլեկտրատեխնիկական գործիքները, ըստ ոստիկանության, գողացել են տանտերերի մոտ ծանոթներ, նույն մարզի Եղվարդ քաղաքի բնակիչ, նախկինում երկու անգամ դատապարտված Արայիկ Հարությունյանը եւ Չարենցավանի բնակիչ, նախկինում չորս անգամ դատապարտված Հարություն Տոնիկյանը, որոնք անհերքելի ճնշման տակ ստիպված են եղել խոստովանական բացատրություն տալ:
Ոստիկանության Նաիրիի բաժնում ձերբակալվածները խոստովանել են, որ տանտիրոջ հետ մոտ ծանոթներ են եղել, նույնիսկ իմացել են՝ բացակայության ժամանակ որտեղ էին պահել տան բանալիները եւ տեղյակ են եղել՝ երբ եւ որքան ժամանակով են բացակայել տանտերերը:
Ըստ խոստովանական ցուցմունքի՝ գողոնը իրացրել են երեւանյան շուկաներից մեկում:
Փաստի առթիվ հարուցվել է քրեական գործ քրեական օրենսգրքի 177-րդ հոդվածի 3-րդ մասի հատկանիշներով: Միջոցառումներ են տարվում գողոնը հայտնաբերելու ուղղությամբ: Քննությունը շարունակվում է: