Մոսկվայի քննիչները պարզել են այս գիշեր քաղաքի կենտրոնում սպանված ընդդիմադիր քաղաքական գործիչ Բորիս Նեմցովի վերջին երթուղին: Մոսկվայի իրավապահ մարմիններից ՏԱՍՍ-ին հայտնել են, որ սպանությունից առաջ Նեմցովն իր հետ գտնվող աղջկա հետ ընթրել է ԳՈՒՄ-ի ռեստորաններից մեկում, որից հետո դուրս են եկել զբոսնելու:
«Ամենայն հավանականությամբ, նրանց հետեւել են ԳՈՒՄ-ից: Հանցակիցներից մեկը մարդասպանին տեղեկացրել է, թե դեպի ու է ուղեւորվում նեմցովը»,-ասել է աղբյուրը:
«Քաղաքական գործիչը աղջկա հետ Կարմիր հրապարակով անցել են դեպի Վասիլեւսկիի զառիթափ, ապա բարձրացել են Մեծ Մոսկվորեցկիի կամուրջ եւ շարժվել Բոլոտնայա հրապարակի կողմը: 200 մետր քայլելուց հետո նրանց հետեւց եկել է արտասահմանյան մի մեքենա, որտեղից կրակել են նեմցովի վրա: Դրանից հետո մեքենան անմիջապես անհետացել է»,-հավելել է գործակալության զրուցակիցը: Նեմցովին ուղեկցող կինը չի տուժել:
Իրավապահ մարմիններում կարծում են, որ սպանությունը մանրամասն ծրագրվել է, որին նախապես են պատրաստվել:
Ներկայումս առգրավվել են փողոցների տեսախցիկների ձայնագրությունները, դրանք ուսումնասիրում են փորձագետները:
Միաժամանակ, ՌԴ Քննչական կոմիտեի Մոսկվայի քննչական գլխավոր վարչության ղեկավարի ավագ օգնական Յուլյա Իվանովան հայտնել է, որ քննությունն ուսումնասիրում է սպանության բոլոր վարկածները եւ չի բացառում, որ այն պատվիրված է եղել:
Հիշեցնենք, որ Մոսկվայի Մեծ Մոսկվորեցկի կամրջի վրա փետրվարի 28-ի գիշերը գնդակահարել են ռուսաստանցի ընդդիմադիր քաղաքական գործիչ, Բորիս Նեմցովին: 55-ամյա քաղաքական գործչի վրա կրակել են 6 անգամ, որից 4-ը դիպել է նրան: Նեմցովը մարտի 1-ին նախատեսված «Գարուն» երթի կազմակերպիչներից մեկն էր:
Քննչական կոմիտեն գործ է հարուցել «սպանություն» եւ «զնեիք ապօրինի շրջանառություն» հոդվածների հատկանիշներով:
