Փետրվարի 28-ին՝ ժամը 14:25-ի սահմաններում ադրբեջանական դիվերսիան հետ մղելու հետեւանքով զոհված Արտակ Սեդրակի Աղեկյանը Տաշիր քաղաքից է: Այս մասին հայտնեցին NEWS.am-ի աղբյուրները:
Մեր տեղեկություններով՝ նա զինված ուժերում է 1996 թվականից, կոչումով փոխգնդապետ է: Մյուս զոհված զինծառայողը՝ ժամկետային Հայկ Բարոյանը զորակոչվել է 2013թ աշնանը, նա Լոռու մարզի Սառչապետ գյուղից է: Սառչապետի գյուղապետարանից տեղեկացանք, որ մահացած ժամկետային զինծառայողը գյուղապետ Բորիս Բարոյանի հորեղբոր որդին է: Հայկ Բարոյանը ունի իրենից փոքր եղբայր, դպրոցն ավարտելուց հետ մեկնել է ծառայության: Մայրը չի աշխատում, հայրը գտնվում է արտագնա աշխատանքի մեջ, դեպքի մասին արդեն նրան տեղյակ են պահել եւ վերադարձել է:
«Ինքը կոմանդիրի շոֆեր է եղել»,-հայտնեցին գյուղապետարանից:
Ավելի վաղ հայտնել էինք, որ փետրվարի 28-ին՝ ժամը 14:25-ի սահմաններում, ՊԲ հյուսիսարեւելյան ուղղությամբ տեղակայված զորամասերից մեկի պահպանության տեղամասի մարտական հենակետերի ուղղությամբ հակառակորդը ձեռնարկել է դիվերսիոն հետախուզական ներթափանցման փորձ:
ՊԲ առաջապահ ստորաբաժանումները ժամանակին հավաստանշել են հակառակորդի հատուկ ջոկատայինների առաջխաղացումը եւ վերջիններիս կորուստներ պատճառելով, հետ շպրտել ելման դիրքեր:
Ցավոք, ծավալված մարտերի ժամանակ զոհվել են զինծառայողներ, 36-ամյա Արտակ Սեդրակի Աղեկյանը եւ 20-ամյա Հայկ Գրիգորի Բարոյանը:
ԼՂՀ պաշտպանության նախարարությունը կիսում է կորստյան ծանր վիշտը եւ իր զորակցությունը հայտնում զոհված զինծառայողների ընտանիքների անդամներին, հարազատներին եւ ծառայակիցներին: Միջադեպի մանրամասները պարզելու համար կատարվում է քննություն:
