Չեմ կարծում՝ «Արարատ ցեմենտը» երբեւէ կդադարի աշխատել անկախ քաղաքական վիճակից: Այս մասին NEWS.am-ի թղթակցի հետ զրույցում ասաց Արարատի նախկին քաղաքապետ Հակոբ Թովմասյանը՝ մեկնաբանելով շրջանառվող տեղեկությունները, թե ԲՀԿ առաջնորդ Գագիկ Ծառուկյանի բիզնեսներից որոշները հնարավոր է փակվեն:
Հակոբ Թովմասյանն ասաց, որ ցեմենտը շինարարության հացն է, առավել ևս՝ տարածաշրջանում չկա նման երկրորդ գործարան, իսկ սոցիալական առումով գործարանը իր ուրույն տեղն ու դերը ունի ցեմենտագործ արարատցու կյանքում Նախկին քաղաքապետն ասաց, որ Արարատը այն եզակի բնակավայրերից է, որտեղ չկան գյուղնշանակության հողեր, մեր քաղաքացիները հիմնականում աշխատում են «Արարատցեմենտում», Ոսկու կորզման ֆաբրիկայում, Ավշարի գինու գործարանում և Ավշարի նոր հիմնված պահածոների գործարանում: Ինչ վերաբերում է Արարատում առկա սոցիալական լարվածությունը թուլացնելուն, Հակոբ Թովմասյանը նկատեց. «Եթե բոլորը մեր տարածաշրջանից մեծամասնականով ընտրված Արայիկ Գրիգորյանի և առհասարակ Գրիգորյան եղբայրների նման հոգածություն ցուցաբերեն, մեզ մոտ բավականին հարցեր տեղում իրենց լուծումը կստանան: Առհասարակ հաճելի է, երբ պատգամավորը հասանելի է և բազմաթիվ սոցիալական խնդիրներ է լուծում»: